2026 оны 6 дугаар сарын 2-ны өдөр Монгол Улсын Засгийн газрын 2019 оны 70 дугаар тогтоол, 2025 оны 78 дугаар тогтоолоор дэвшүүлсэн барилга, дэд бүтцийн салбарт ФИДИК (FIDIC)-ийн жишиг гэрээний хэрэглээг үе шаттайгаар нэвтрүүлэх зорилтын хүрээнд “FIDIC 360°” сургалт Барилгын хөгжлийн төвийн сургалтын танхимд амжилттай зохион байгуулагдлаа.

Сургалтад Барилгын хөгжлийн төв болон салбарын нийт 22 инженер, техникийн ажилтан, мэргэжилтэн хамрагдсан бөгөөд оролцогчдын дунд Хөвсгөл аймаг, ОСНААУГ болон бусад байгууллагын ахлах инженер, хяналтын инженер, удирдах түвшний төлөөллүүд оролцсон байна.

Нийт 20 цагийн үргэлжилсэн сургалтыг олон улсын гэрчилгээтэй сургагч багш нар болох Я. Оюун-Эрдэнэ, Д. Чинзориг нар удирдан явуулж, ФИДИК гэрээний үндсэн ойлголт, гэрээний төрлүүд болон зөв сонголт хийх аргачлал, тендерийн баримт бичиг боловсруулах, гэрээний тусгай нөхцөл боловсруулах арга зүй, гэрээний хэрэгжилтийн үе шат дахь эрх, үүрэг, эрсдэлийн удирдлага, шаардлага ба нэхэмжлэлийн зохицуулалт зэрэг сэдвүүдийг хамруулан сургалт зохион байгууллаа.

Мөн гэрээний хаалт, маргаан шийдвэрлэх механизм, олон улсын шилдэг туршлагын талаар мэдлэг олгож, оролцогчдыг бодит төслүүдэд тулгардаг кейсүүд дээр ажиллуулснаар ФИДИК гэрээний нөхцөлийг практикт хэрэглэх ур чадварыг нь бэхжүүлэв.

Сургалтад хамрагдсан мэргэжилтнүүд улсын төсөв, гадаадын зээл, тусламжийн хөрөнгөөр хэрэгжиж буй барилга, дэд бүтцийн төслүүдийн гэрээний удирдлага, эрсдэлийн хяналтыг сайжруулахад шаардлагатай мэдлэг, туршлага хуримтлуулсан бөгөөд энэхүү арга хэмжээ нь ФИДИК-ийн жишиг гэрээний хэрэглээг өргөжүүлэх, олон улсын жишигт нийцсэн гэрээний удирдлагын тогтолцоог төлөвшүүлэхэд чухал ач холбогдолтой болсон гэж онцолж байна.