УИХ-ын чуулганы тавдугаар сарын 21-ний өдрийн нэгдсэн хуралдаанаар Гадаад зээлийн ашиглалт, чанарыг дээшлүүлэх тухай хуулийн төслийг хэлэлцэн дэмжлээ. Засгийн газраас өргөн мэдүүлсэн уг төслийг Сангийн яам дахин боловсруулж, өмнө нь тусгаад байсан Сэлбэ дэд төв төслийг хассан байна.

Албаныхны мэдээлснээр, 

УИХ-ын зарим гишүүд эсэргүүцсэнтэй холбоотойгоор “20 минутын хот” концепц бүхий Сэлбэ дэд төвийг төслөөс гаргажээ. 

Харин дараах хоёр мега төслийг хэвээр үлдээсэн байна. 

Үүнд:

• Газрын тос боловсруулах үйлдвэр
• Эрдэнэбүрэнгийн усан цахилгаан станц

Эдгээр төслүүд нь Засгийн газрын 2024–2028 оны үйл ажиллагааны хөтөлбөрт туссан 14 мега төслийн бүрэлдэхүүнд багтаж байгаа юм.

Өнөөдрийн байдлаар Монгол Улсад 20.9 их наяд төгрөгийн амлалтын дүн бүхий гадаад зээлийн 74 төсөл хэрэгжиж байгаагаас санхүүжилтийн ашиглалт нь дөнгөж 34 хувьтай байна. 

Эдгээр төслүүдийн 82 хувь нь 2026–2029 онд хэрэгжиж дуусахаар төлөвлөгдсөн тул Засгийн газар гадаад зээлийн хөрөнгийн ашиглалт, хэрэгжилтийн үр ашгийг яаралтай нэмэгдүүлэх шаардлагатай гэж үзэж байна.