Монгол-Польшийн Засгийн газар хоорондын комиссын хоёр талын даргалагч нар 5 дугаар сарын 19-ний өдөр цахим уулзалт хийлээ. Уулзалтад Хот Байгуулалт, Барилга, Орон Сууцжуулалтын Яамны сайд Э.Бат-Амгалан, УИХ-ын гишүүн, Монгол-Польшийн парламентын бүлгийн Монголын талын дарга Ж.Золжаргал болон хоёр улсын холбогдох яам, дипломат төлөөлөгчийн газрын төлөөллүүд оролцов.

Уулзалтаар талууд Засгийн газар хоорондын комиссын ээлжит гуравдугаар хуралдааны бэлтгэл ажлыг хэлэлцсэн бөгөөд хоёр улсын харилцааг "Иж бүрэн түншлэл" болгон шат ахиулсан нь хамтын ажиллагааг шинэ шатанд гаргасныг онцлов. 

Мөн цаашид худалдаа, хөрөнгө оруулалт, уул уурхай, геологи, хот байгуулалт, дэд бүтэц, байгаль орчин, боловсрол, соёл, хөдөө аж ахуйн салбарын хамтын ажиллагааг өргөжүүлэх боломжуудын талаар мэдээлэл солилцсон байна.

Түүнчлэн 2017 онд байгуулсан Нөхцөлт зээлийн хэлэлцээрийн хүрээнд Баян-Өлгий, Говьсүмбэр, Дорнод, Увс, Завхан аймгуудад хэрэгжиж буй “Аймгуудын бохир ус цэвэрлэх байгууламжийг өргөтгөн шинэчлэх, шинээр барих төсөл”-ийн явц, тулгамдсан асуудлыг хэлэлцэж, төслүүдийг үр дүнтэй хэрэгжүүлэхэд хамтран ажиллахаар тохиролцлоо.