Монголын Ипотекийн Корпораци (МИК) ХХК-ийн 20 жилийн ойн хүрээнд “Орон сууцны санхүүжилт 2026” олон улсын форумыг 2026 оны зургаадугаар сарын 8-ны өдөр Улаанбаатар хотноо зохион байгуулахаар болжээ.

Тус форум нь Монгол Улсад хэрэгжиж буй орон сууцны санхүүжилтийн тогтолцоог олон улсын жишигт нийцүүлэн дараагийн шатанд хөгжүүлэх, гадаадын хөрөнгө оруулалт болон санхүүжилтийн эх үүсвэр татах, иргэдийн орон сууцны хүртээмжийг нэмэгдүүлэхэд чиглэж буйгаараа онцлог юм. Мөн төр, хувийн хэвшлийн хамтын ажиллагааг өргөжүүлэх шинэ боломжуудыг хэлэлцэх аж.

Форумын үеэр Монгол болон олон улсын экспертүүд:

• орон сууцны санхүүжилтийн олон улсын тогтолцоо,
• дэлхийн бондын зах зээлийн чиг хандлага, геополитикийн нөлөөлөл,
• тогтвортой, ногоон орон сууцны санхүүжилтийн хөгжил

зэрэг сэдвийн хүрээнд илтгэл хэлэлцүүлэг өрнүүлнэ.

Арга хэмжээнд Азийн ипотекийн хоёрдогч зах зээлийн холбооны гишүүн орнуудын Төр-хувийн хэвшлийн байгууллагууд, Европын ипотекийн холбоо ба Барьцаат бондын зөвлөл, HSBC, Deutsche Bank зэрэг олон улсын хөрөнгө оруулалтын банкууд болон санхүүгийн байгууллагын төлөөлөл оролцохоор төлөвлөжээ.

Мөн Азийн ипотекийн хоёрдогч зах зээлийн холбооны ээлжит чуулга уулзалтыг 2026 оны зургаадугаар сарын 9-нд Монгол Улсад зохион байгуулах бөгөөд гишүүн байгууллагуудын хамтын ажиллагаа, бүс нутгийн ипотекийн хоёрдогч зах зээлийн хөгжлийн асуудлыг хэлэлцэх юм.

МИК нь бүс нутаг болон олон улсын ижил төрлийн байгууллагуудтай хамтын ажиллагаагаа өргөжүүлэн ажиллаж байгаа бөгөөд тус байгууллагын гүйцэтгэх захирал Б.Гантулга өнгөрсөн онд ASMMA-ийн Нарийн бичгийн даргаар хоёр дахь удаагаа сонгогдон ажиллаж байна.