Бүгд Найрамдах Хятад Ард Улс-ын шинэ орон сууцны үнийн бууралт дөрөвдүгээр сард саарч, үл хөдлөх хөрөнгийн салбар олон жилийн уналтын дараа тогтворжих хандлагтай байгааг шинжээчид онцолж байна.

Албан ёсны статистик мэдээллээр, 

Төрийн дэмжлэгтэй орон сууцыг хассан 70 хотын шинэ орон сууцны үнэ дөрөвдүгээр сард өмнөх сараас 0.19 хувиар буурсан нь сүүлийн нэг жилийн хамгийн бага хэмжээний уналт болжээ. Мөн хуучин орон сууцны үнэ 0.23 хувиар буурсан нь 2025 оны гуравдугаар сараас хойших хамгийн бага үзүүлэлт болсон байна.

Сүүлийн жилүүдэд өрийн дарамт, барилгын компаниудын санхүүгийн хүндрэл, борлуулалтын огцом бууралтаас шалтгаалан БНХАУ-ын үл хөдлөх хөрөнгийн салбар тус улсын эдийн засгийн томоохон эрсдэлийн нэг болоод байсан юм. 

Харин эрх баригчид ипотекийн зээлийн нөхцөлийг зөөлрүүлэх, орон сууц худалдан авалтыг дэмжих зэрэг бодлого хэрэгжүүлснээр зах зээлд тодорхой эерэг өөрчлөлт ажиглагдаж эхэлжээ.

Гэсэн хэдий ч шинжээчид зах зээл бүрэн сэргэхэд хугацаа шаардлагатайг анхааруулсаар байна. Томоохон хотуудад эрэлт аажмаар нэмэгдэж байгаа ч жижиг хотуудад борлуулагдаагүй орон сууцны илүүдэл, худалдан авагчдын итгэл сул хэвээр байгаа аж.