Олон нийтэд эрчим хүчний хэмнэлттэй амины орон сууц барих, дэд бүтэц инженерийн шийдлийн цогц мэдээллийг нэг дороос хүргэх зорилгоор "Амины орон сууц экспо" үзэсгэлэн яармаг тавдугаар сарын 15-17-ны өдрүүдэд Барилгачин худалдааны төвд болж өндөрлөлөө. 

Тус үзэсгэлэнгийн ерөнхий зохион байгуулагчаар "Барилга МН" ажилласан бол Хамтран зохион байгуулагчаар Хот Байгуулалт, Барилга, Орон Сууцжуулалтын Яам, Барилгын хөгжлийн төв, Нийслэлийн Засаг даргын Тамгын газар хамтран зохион байгуулагчаар оролцлоо.

Энэ удаагийн үзэсгэлэнд барилгын материал, инженерийн дэд бүтэц, ухаалаг систем, эрчим хүчний хэмнэлттэй шийдлүүдийг 70 гаруй шилдэг аж ахуйн нэгж, байгууллагууд олон нийтэд танилцууллаа. Гурван өдрийн турш үргэлжилсэн тус арга хэмжээг давхардсан тоогоор нийт 3,900 гаруй иргэд, үйлчлүүлэгчид зорин ирж, өргөн хүрээнд оролцлоо. 

Үзэсгэлэнгийн үеэр иргэдийг мэдээллээр хангах зорилгоор барилгын зөв шийдэл, эрчим хүчний хэмнэлт болон ногоон технологийн чиглэлээр 9 удаагийн сургалт, семинарыг зохион байгуулсан юм. Эдгээр сургалтад давхардсан тоогоор 333 иргэн хамрагдаж, мэргэжлийн зөвлөгөө, мэдээллийг бодитоор авсан нь иргэдийн зайлшгүй хэрэгцээг хангасан, үр өгөөжтэй арга хэмжээ болсныг харууллаа. 

Арга хэмжээний сүүлийн өдөр салбартаа шинэлэг техник, технологи нэвтрүүлж, эрчим хүчний хэмнэлттэй шийдлийг бодитоор хэрэгжүүлсэн шилдэг байгууллагуудыг шалгаруулсан юм.

Ногоон хөгжил, инновацоороо манлайлж, шилдгээр шалгарсан компаниудыг танилцуулж байна.

“ШИЛДЭГ ОРОЛЦОГЧ БАЙГУУЛЛАГА”-аар "Акуа Терм" ХХК 

Акуа Терм ХХК нь 2006 онд үүсгэн байгуулагдсан бөгөөд 100 гаруй ажилтантайгаар барилгын инженерийн шугам сүлжээ, халаалт, усан хангамжийн дэвшилтэт шийдлийг Монголын зах зээлд амжилттай нэвтрүүлж буй салбарын тэргүүлэгч байгууллагуудын нэг юм. Тус компани нь Европ стандартын бүтээгдэхүүн, инженерийн иж бүрэн шийдлийг хэрэглэгчдэд хүргэхийн зэрэгцээ зураг төсөл, зөвлөх үйлчилгээ, угсралт, борлуулалтын дараах сервисийг цогцоор нь хэрэгжүүлдэг.

“ШИЛДЭГ ДЭВШИЛТЭТ ТЕХНОЛОГИ НЭВТРҮҮЛЭГЧ”-ээр "Мон Кабель Системс" ХХК 

Ухаалаг, ногоон эрчим хүчний системийн инновац бүтээгч Мон Кабель Системс ХХК нь  2005 онд үүсгэн байгуулагдсан бөгөөд 150 гаруй ажилтантайгаар инженерийн дэд бүтэц, ухаалаг барилгын системийн салбарт тасралтгүй хөгжиж буй үндэсний компани юм. Тус компани нь хиймэл оюун ухаанд суурилсан, зайнаас удирдах боломжтой hybrid системийг амжилттай нэвтрүүлж, нарны хавтан, инвертер, батарей хосолсон эрчим хүчний ухаалаг шийдлийг танилцууллаа. Энэхүү систем нь цаг агаарын бодит нөхцөлд автоматаар дасан зохицож, эрчим хүчний хэрэглээг оновчтой удирдан, алдагдлыг бууруулж, ногоон эрчим хүчний хэрэглээг нэмэгдүүлэх боломжийг бүрдүүлж байна.

“ШИЛДЭГ ГҮЙЦЭТГЭЛ, ТӨСӨЛ ХЭРЭГЖҮҮЛЭГЧ”-ээр "Хангал Констракшн" ХХК 

Хангал Констракшн ХХК нь  2012 онд үүсгэн байгуулагдсан бөгөөд 150 гаруй ажилтантайгаар эрчим хүчний хэмнэлттэй, байгальд ээлтэй амины орон сууцны шийдлийг Монгол орны уур амьсгалд нийцүүлэн хөгжүүлж буй туршлагатай компани юм. Тус компани нь олон төсөл амжилттай хэрэгжүүлж, төслийн төлөвлөлтөөс эхлэн гүйцэтгэл, ашиглалтад оруулах хүртэлх бүх үе шатанд чанар, аюулгүй байдал, эрчим хүчний хэмнэлтийг ханган ажиллаж байна. Мөн барилга ашиглалтад орсны дараах баталгаат засвар үйлчилгээ, хэрэглэгчийн санал гомдолд шуурхай хандах, урт хугацааны үйлчилгээний тогтолцоогоороо хэрэглэгчдийн итгэлийг хүлээсэн.

“ШИЛДЭГ БҮТЭЭГДЭХҮҮН”-ээр "Евро Зиги Инженеринг" ХХК 

Евро Зиги Инженеринг ХХК нь 2002 онд үүсгэн байгуулагдсан инженерийн шугам сүлжээ, халаалт, сантехникийн чиглэлээр Европ стандартын бүтээгдэхүүнийг Монголын зах зээлд нийлүүлж ирсэн туршлагатай компани юм. Тус компани нь олон нэр төрлийн бараа материал, инженерийн бүтээгдэхүүн нийлүүлж, хэрэглэгчдэд чанар, найдвартай байдал, өргөн сонголтыг санал болгож байна. Мөн борлуулалтын дараах үйлчилгээ, баталгаат засвар, техникийн зөвлөгөө, хэрэглэгчийн санал гомдлыг шийдвэрлэх шуурхай системээрээ хэрэглэгчийн сэтгэл ханамжийг өндөр түвшинд хадгалж чадсан.

Цаг агаар тогтворгүй байсан ч гурван өдрийн турш 'Барилгачин худалдааны төв'-ийг зорьж, амины орон сууцны ногоон өдрүүдэд нэгдэн, өөрт хэрэгцээтэй шинэлэг шийдлүүдийг сонгосон нийт иргэд, үйлчлүүлэгчид болон оролцсон байгуулгууддаа талархал илэрхийлье. 

Тус үзэсгэлэн нь жилээс жилд цар хүрээгээ тэлж, Монгол орны уур амьсгалд нийцсэн шилдэг шийдэл, дэвшилтэт технологиудыг амьдралд нэвтрүүлэхэд чухал түлхэц болсоор байх болно.