Барилгын хөгжлийн төвийн Орон сууц, нийтийн аж ахуй, дэд бүтцийн хөгжлийн хэлтсээс 2026 оны нэгдүгээр улирлын байдлаар улсын хэмжээн дэх дэд бүтцийн барилга байгууламжийн нэгдсэн судалгааг шинэчлэн гаргалаа. 

Уг судалгаанд нийт 330 сум хамрагдсан байна.

Ус хангамжийн салбарын хувьд улсын хэмжээнд төвлөрсөн ус хангамжийн эх үүсвэртэй 182 сум, төвлөрсөн бус эх үүсвэртэй 148 сум байгаа бөгөөд нийт 1,809 гүний худаг, 1,681 километр цэвэр усны шугам, гэр хорооллын иргэдэд үйлчилдэг 1,800 ус түгээх байр ажиллаж байна. Цэвэрлэх байгууламжийн хувьд 140 суманд ашиглалтад орсон, 40 гаруй суманд шинээр баригдаж байгаа бол 190 гаруй суманд цэвэрлэх байгууламж байхгүй байна. 

Улсын хэмжээнд нийт 154 цэвэрлэх байгууламж тоологдсоноос 14 нь Улаанбаатар хот болон түүний дагуул дүүргүүдэд байршилтай бөгөөд бохир усны шугамын нийт урт 1,537 километр байна. Дулаан хангамжийн салбарт төвлөрсөн дулаан хангамжийн эх үүсвэртэй 280 сум, бие даасан уурын зуухаар халдаг 50 сум байгаа бөгөөд нийт 789 халаалтын зуух, 1,526 километр дулааны шугам сүлжээ бүртгэгджээ.

Менежмент болон ашиглалтын хувьд ус хангамж, ариутгах татуургын инженерийн дэд бүтцийг 52 суманд мэргэжлийн байгууллага хариуцаж байгаа бол 100 гаруй суманд тусгай зөвшөөрөлгүй буюу Засаг даргын Тамгын газар хариуцан ажиллуулж байна. Дулаан хангамжийн эх үүсвэрийн хувьд 210-ыг нь хувийн хэвшлийн компаниуд, 70 гаруй сумынхыг төрийн болон орон нутгийн өмчит үйлдвэрийн газрууд хариуцдаг. 

Барилгын хөгжлийн төвөөс цаашид эдгээр дэд бүтцийн барилга байгууламжийн ашиглалтыг мэргэжлийн байгууллагад шилжүүлэх, орон нутагт хүний нөөцийг бэлтгэж, чадавхжуулах сургалтуудыг үе шаттай зохион байгуулахаар төлөвлөн ажиллаж байна.