Хот Байгуулалт, Барилга, Орон Сууцжуулалтын Яамнаас барилгын салбарт хяналт хэрэгжүүлж буй аймаг, нийслэлийн барилгын техникийн улсын байцаагчдын дунд “Хууль, норм, дүрмийн хэрэгжилт” сэдэвт хэлэлцүүлэг зохион байгууллаа.

Тус хэлэлцүүлэгт 60 гаруй улсын байцаагч болон Засгийн газрын Хяналт хэрэгжүүлэх газар, Улсын ерөнхий прокурорын газар, Монголын Хуульчдын холбоо, Барилгын хөгжлийн төв, 20 минутын хот хөгжлийн төв зэрэг байгууллагын төлөөлөл оролцов.

Арга хэмжээг нээж ХББОСЯ-ны Төрийн нарийн бичгийн дарга  М.Баяраа “Эрх зүйн орчин болон тулгамдсан асуудлын талаар нэгдсэн ойлголтод хүрч, улсын байцаагчдын чадавхыг бэхжүүлэх чухал арга хэмжээ болж байна” хэмээн онцолсон байна.

Хэлэлцүүлгийн үеэр Барилгын ерөнхий хууль (шинэчилсэн найруулга), Хот байгуулалтын тухай хууль (шинэчилсэн найруулга), Орон сууцжуулалтын тухай хууль (анхдагч хууль), Орон сууцны санхүүжилтийн банкны тухай хууль (анхдагч хууль), Төр, иргэний тухай хуулийн үзэл баримтлал зэрэг хуулийн төсөл, үзэл баримтлалуудыг танилцуулсан байна.

Мөн Барилгын салбарын эрх зүйн тогтолцоо болон улсын байцаагчдын захиргааны хэм хэмжээний актын хэрэгжилт гэсэн хоёр чиглэлээр хэлэлцүүлэг өрнүүлж, оролцогчдын саналыг нэгтгэн хуулийн төслүүдийг боловсруулж буй ажлын хэсэгт хүргүүлэхээр болжээ.