Сингапурын Засгийн газар үл хөдлөх хөрөнгийн үнийн хэт өсөлт, дамлан худалдааг хязгаарлах зорилгоор төрийн дэмжлэгтэй орон сууцтай холбоотой шинэ журам хэрэгжүүлэхээр болсон бөгөөд энэ шийдвэрийг Үндэсний хөгжлийн сайд 2026 оны тавдугаар сарын 8-нд зарласан байна. 

Үндэсний хөгжлийн сайдын мэдээлснээр шинэ зохицуулалт нь төрөөс татаас олгодог, хямд үнэтэй нийтийн орон сууцанд хамаарах аж. Шинэ журмын хүрээнд сууц өмчлөгч байрандаа заавал оршин суух доод хугацааг одоогийн таван жилээс 10 жил болгон хоёр дахин нэмэгдүүлжээ.

Засгийн газар энэхүү арга хэмжээ нь орон сууцыг богино хугацаанд ашиг олох зорилгоор дамлан худалдах явдлыг бууруулж, анх удаа байр худалдан авч буй иргэдэд илүү боломж бүрдүүлнэ гэж үзэж байна.

Сүүлийн жилүүдэд Сингапурт орон сууцны үнэ эрчимтэй өсөж, үл хөдлөх хөрөнгийн зах зээлийн хэт халалттай холбоотой эрсдэл нэмэгдээд байгаа юм.

Үүнтэй холбоотойгоор Засгийн газар өмнө нь гадаад худалдан авагчдад ногдуулах татвар, ипотекийн зээлийн шалгуурыг чангатгах зэрэг хэд хэдэн бодлого хэрэгжүүлж байсан байна.