Монгол Улсын Засгийн газар орлого багатай иргэдийн орон сууцны хүртээмжийг нэмэгдүүлэх зорилгоор ипотекийн зээлийн шинэ, уян хатан тогтолцоо нэвтрүүлэхээр ажиллаж байгааг Ерөнхий сайд Н.Учрал мэдэгдлээ. 

Уг зохицуулалтаар орон сууцны үнийн 50 хувийг ипотекийн зээлээр, үлдсэн 50 хувийг “түрээслээд өмчлөх” хэлбэрээр шийдвэрлэх боломж бүрдэх юм.

Шинэ зохицуулалтын хүрээнд урьдчилгаа төлбөрийг 50 хүртэл хувиар бууруулах бөгөөд ингэснээр залуу гэр бүл болон бага орлоготой өрхүүд орон сууцанд хамрагдах боломж нэмэгдэхээр байгааг онцолжээ. Мөн уг бодлого нь гэр хорооллын янданг бууруулах, агаарын бохирдлыг багасгах зорилготой уялдаж байгаа аж.

Монголбанкны мэдээлснээр, 2026 оны хоёрдугаар сарын байдлаар ипотекийн зээлийн шийдэгдээгүй хүсэлт 5.5 их наяд төгрөгт хүрээд байгаа бөгөөд энэ онд нийт нэг их наяд орчим төгрөгийн ипотекийн зээл олгохоор төлөвлөжээ. Харин ипотекийн зээлийн нийт үлдэгдэл 11.7 их наяд төгрөгт хүрч, өмнөх оны мөн үеэс 20.7 хувиар өссөн байна.

Үүнтэй холбоотойгоор “түрээслээд өмчлөх” хэлбэрийн орон сууцны төслүүд ч эрчимжиж байна. Тухайлбал, ТОСК-ийн хэрэгжүүлж буй “Солонго 1, 2” төслийн эхний ээлжийн 2042 айлын орон сууц энэ онд ашиглалтад орох бөгөөд зорилтот бүлгийн иргэдийг онооны системээр сонгон хамруулах юм.