Сар тутмын Барилга МН сэтгүүлийн 05 дугаар сарын дугаар буюу  192 дахь дугаар уншигчдадаа хүрч эхэллээ. 

Энэ удаагийн нүүр хуудсанд ЭС ЭН ДИ ХХК хамтран ажиллаа. Тус компани нь 2006 онд байгуулагдсан бөгөөд 2019 оноос хойш барилгын ус тусгаарлалтын технологи, материалын ханган нийлүүлэлт болон иргэний барилга, дэд бүтцийн байгууламжуудын ус тусгаарлах ажлыг гүйцэтгэх чиглэлээр үйл ажиллагаа явуулж байна.

VIP ярилцлага: 

Э.УЧРАЛ: ИНЖЕНЕРИЙН ҮНЭ ЦЭН НЬ ШУДАРГА БУС ШААРДЛАГАД “ҮГҮЙ” ГЭЖ ХЭЛЭХ ЗОРИГТ ОРШДОГ

Барилгын салбарын хөгжил, олон улсын стандарт, инженерийн ёс зүй хийгээд дэлхийн тавцанд Монгол инженерүүд хэрхэн үнэлэгдэж байгаа талаарх нэгэн сонирхолтой ярилцлагыг бид энэ удаагийн дугаартаа онцлон бэлтгэлээ. Бидний урилгыг хүлээн авч ярилцсан зочин маань Монголын томоохон төслүүд болох Шангри-Ла, Оюу Толгойн барилга байгууламж дээр ажиллаж байсан туршлагатай бөгөөд өдгөө Австрали улсын уул уурхайн салбарт төслийн инженерээр амжилттай ажиллаж байгаа Эрдэнийн Учрал юм. Энэхүү ярилцлага нь залуу инженерүүдэд урам зориг өгч, салбарын хөгжилд шинэ санаа, туршлага нэмнэ гэдэгт итгэлтэй байна.

СУДАЛГАА: МОНГОЛЫН БАРИЛГЫН САЛБАРЫН ХӨДӨЛМӨРИЙН НӨХЦӨЛ

Монгол Улсын барилгын салбар нь улс орны бүтээн байгуулалт, эдийн засгийн өсөлтийн гол хөдөлгүүрүүдийн нэг билээ. Үндэсний статистикийн хорооны мэдээллээр барилгын салбарт 8,280 аж ахуйн нэгж үйл ажиллагаа явуулж, 79,821 хүн ажиллаж байна. Энэ нь Монгол Улсын нийт ажиллах хүчний 6.1 хувийг эзэлж буй үзүүлэлт юм. Гэвч өндөр шилэн барилгууд, сүндэрлэх орон сууцуудын цаана хөдөлмөрийн нөхцөл, аюулгүй байдал, хүний эрхийн ноцтой асуудлууд хэр байна вэ?

Олон Улсын Хөдөлмөрийн Байгууллага (ОУХБ) болон Үндэсний Судалгаа Зөвлөгөөний Төв (NRCC)-өөс 2025 онд гаргасан "Монгол Улсын барилгын салбар дахь хөдөлмөрийн нөхцөл: Тоон болон чанарын судалгааны дүн" тайлангаас энэхүү асуултын хариуг гаргажээ. Тус судалгааны гол үр дүн, тоо баримт болон графикуудад үндэслэн барилгын салбарын хөдөлмөрийн нөхцөлийн өнөөгийн дүр зургийг хүргэж байна.

МИНИЙ ТҮҮХ: ШУГАМ ХООЛОЙН “ЭМЧ”

Ажил мэргэжил, карьер гэх ойлголтыг өнөө үед костюм, зангиатай оффисын шилэн барилгад ажиллахаар төсөөлдөг, дүгнэдэг хандлага нийгэмд түгээмэл болсон. Үүнийг дагаад нарийн мэргэжлийн ажиллах хүчний хомсдол тулгамдсан асуудлын нэг болоод байна.

Харин бодит амьдрал дээр улсын хүн амын 50 гаруй хувь нь амьдардаг Улаанбаатар хотын өдөр тутмын хэвийн үйл ажиллагааг нуруундаа үүрч байдаг мэргэжлүүдийн тоонд яах аргагүй нарийн мэргэжлийн ажилчид багтдаг. Гэвч нарийн мэргэжилтнүүдийг хар, бор ажил гэж үл хүндэтгэх нь элбэг.

Харин энэ хэвшмэл ойлголтыг эвдэж, өөрийн хийж буй ажлаараа бодит үнэ цэнийг бүтээж, мэргэжлээ бахархал болгон авч явж буй Gen Z үеийн төлөөлөл 22 настай сантехникийн засварчин Д.Санжиджамцын түүхийг энэ удаагийн дугаартаа хуваалцлаа. 

НИЙТЛЭЛ: Улаанбаатарын түүхийн дурсгалт барилгууд /Ой санамж - үгүй хот/

Улаанбаатар хотын түүхэн өнгө төрх, архитектурын үнэт өвийг илэрхийлдэг барилга байгууламжууд өнөөдөр цаг хугацааны хүрд, хот байгуулалтын шинэчлэлийн эгзэгтэй огтлолцол дээр ирээд байна. Архитектур гэдэг бол тухайн цаг үеийнхээ нийгмийн үнэт зүйл, гоо зүй, технологийг хадгалсан “чулуун шастир” юм.

Нэгэн цагт нийслэлийн соёл, иргэдийн нийгмийн амьдралын төв байсан эдгээр барилгууд өнөөдөр өөр өөр хувь тавилантай тулгарч байна. Зарим нь газрын хөрснөөс арчигдаж, зарим нь өнгө төрхөө өөрчилж, харин үлдсэн хэсэг нь “буулгах уу, үлдээх үү” гэх шийдвэрийн ирмэг дээр дэнжгэнэж байна.

Хотын хөгжил, шинэчлэл зайлшгүй хэрэгтэй хэдий ч өнгөрснөө хадгалж үлдэх нь үнэ цэнийг бий болгож, өнгөрснийг сануулж, мартагдахаас хамгаалдаг. Тиймээс бид Улаанбаатар хотын түүхэн барилга байгууламжуудын хувь заяаг хөндөж дараах байдлаар ангилан цувралаар хүргэхээр зорилоо. Энэ удаагийн дугаарт Зүүн хүрээний нууц бүлгэмийн байшинг талаар нийтэллээ.

ШИНЭ МАТЕРИАЛ: КАЛЬЦИЙН СИЛИКАТАН ДУЛААН ТУСГААРЛАГЧ МАТЕРИАЛ

Монгол улс нь 2024 оны байдлаар вермикулит, хөөсөн шавар, доломит болон шамот зэрэг эрдэс суурьтай дулаан тусгаарлах материалыг 1.8 мянган тонныг импортлон оруулж ирж хэрэглэсэн бөгөөд үүнд эрдэс хөвөнгийн хэмжээ ороогүй болно. Өөрөөр хэлбэл эрдэс суурьтай дулаан тусгаарлах материалын ихэнх хэсгийг импортлон оруулж ирж хэрэглэдэг гэсэн үг юм. Иймээс энэхүү нийтлэлдээ манай улсад үйлдвэрлэх боломжтой эрдэс суурьтай дулаан тусгаарлах материалын талаар танилцуулахыг зорилоо.

АРХИТЕКТУР ДИЗАЙН:  Прицкерийн шинэ эзэн СМИЛЯН РАДИЧ КЛАРКЕ

Архитектурын ертөнцөд жил бүр хамгийн онцгой хувь нэмэр оруулсан эрхэмд олгодог 100,000 ам.долларын шагнал болон хүрэл медалийн 50 дахь удаагийн түүхэн босгыг давсан ялагчаар Чилийн нэрт архитектор Смилян Радич Кларке тодорч, салбарынхаа түүхэнд нэрээ мөнхөллөө. 

Смилян Радич нь Прицкерийн шагналыг хүртэж буй Чили улсын хоёр дахь архитектор (2016 оны ялагч Алехандро Аравенагийн дараа) болж байна. Түүний бүтээлүүд, архитектурын шийдлийн талаар энэхүү булангаас хүлээн авч уншаарай. 

Мөн та Та чадна, Мэргэжилтний зөвлөмж, барилгын салбарт болсон хамгийн сүүлийн үеийн гадаад болон дотоод мэдээ мэдээллийг хүлээн авч уншаарай.