Барилгын салбарын ажилтны давтан сургалт, мэргэжил дээшлүүлэх болон мэргэшлийн зэрэг олгох ажлыг зохион байгуулах төрийн чиг үүргийг хэрэгжүүлэх гэрээний хугацааг 3 жилээр сунгалаа.

Анх 2024 оны есдүгээр сард ХББОСЯ-ны сайдын 41 дүгээр тушаалаар уг чиг үүргийг барилгын салбарын мэргэжлийн холбоодын түншлэлээр гэрээгээр хэрэгжүүлэхээр шийдвэрлэж, 2025 оны арванхоёрдугаар сарын 31-ний өдөр хүртэл хэрэгжүүлсэн юм. 

Энэхүү төрийн чиг үүргийг хамтран хэрэгжүүлэхээр Монголын Барилгын Инженерүүдийн Холбоо (МБИХ), Монголын барилгын зураг төсөл зохиогчдын холбоо, Барилгын төсөвчдийн холбоо, Монголын Барилгын Гүйцэтгэгч Байгууллагуудын Холбоо (MACC), Монголын Барилгын Инженер-геологичдын холбоо, Монголын нийтийн аж ахуйн үйлчилгээний холбоо, Монголын Бетоны холбоо ТББ, Өргөн Тээвэрлэх Машин Төхөөрөмж Үндэсний Холбоо, Барилгын Сургалт Хөгжлийн Академи зэрэг барилгын салбарын мэргэжлийн есөн холбоо нэгдэн ажиллаж, холбоодыг төлөөлөн “Монголын Барилгын Инженерүүдийн Холбоо” ТББ гэрээ байгуулан үйл ажиллагааг зохион байгуулсан байна.

Гэрээний хугацаанд:

• Барилгын салбарын 47 мэргэшлийн хүрээнд мэргэжил дээшлүүлэх сургалтын хөтөлбөрийг 50 хувиар баяжуулж,
• 142 сэдэв, 692 агуулгатай сургалтыг зохион байгуулан,
• Нийт 6106 инженерийг хамруулсан байна.

Мөн мэргэшлийн зэрэг шинээр олгох болон сунгах шалгалтыг хоёр удаа зохион байгуулж, нийт 1352 инженер, мэргэжилтэн хамрагджээ. Шалгалтын бүртгэл, хуваарь, үнэлгээний үйл явцыг бүрэн цахимжуулсан нь онцлох ажил болсон байна.

Түншлэлээс гэрээний хэрэгжилтийн хагас болон бүтэн жилийн тайланг ХББОСЯ-нд хүргүүлсний үндсэн дээр ХББОСЯ-ны сайдын 2026 оны дөрөвдүгээр сарын 9-ний өдрийн 63 дугаар тушаалаар уг төрийн чиг үүргийг 3 жилийн хугацаатай үргэлжлүүлэн хэрэгжүүлэхээр шийдвэрлэжээ.

Үүний дагуу 2026 оны тавдугаар сарын 7-ны өдөр ХББОСЯ-ны Төрийн нарийн бичгийн дарга М.Баяраа шинэ гэрээ байгуулсан байна.Цаашид тус түншлэл:

• сургалтын хөтөлбөрийг тасралтгүй сайжруулах,
• олон улсын туршлагад нийцсэн мэргэжил дээшлүүлэх тогтолцоог бүрдүүлэх,
• мэргэшсэн инженерүүдийн нэгдсэн мэдээллийн сан байгуулах,
• сургалтын болон мэргэшлийн гэрчилгээг цахимжуулах зэрэг ажлыг үе шаттай хэрэгжүүлэхээр төлөвлөж байгаагаа мэдэгдлээ.

Мөн барилгын салбарын инженер, мэргэжилтнүүдийн мэдлэг, ур чадвар, үнэлэмжийг дээшлүүлэх үйлсэд хамтран ажилласан төрийн бус байгууллагууд болон салбарын нийт инженер, мэргэжилтнүүдэд талархал илэрхийллээ.