Английн Бермингем хотын төвд сүндэрлэх The Octagon нь орчин үеийн хот байгуулалт, архитектурын сэтгэлгээ хэрхэн шинэ түвшинд хүрч байгааг харуулах тод илэрхийлэл юм. 49 давхар, 155 метр өндөр энэ цамхаг анх харахад л өөр. Дугуй биш, дөрвөлжин биш харин төгс тэнцвэртэй найман өнцөгт хэлбэртэй. Энэхүү өвөрмөц шийдэл нь түүнийг Бермингемийн хамгийн өндөр дэлхийн архитектурын түүхэнд анх удаа “цэвэр найман өнцөгт орон сууцны цамхаг” хэмээн тэмдэглэгдэх онцгой бүтээл болгожээ.

Яагаад The Octagon онцгой вэ?

●    Дэлхий дээрх анхны “цэвэр найман өнцөгт” орон сууцны тэнгэр баганадсан барилга

●    Барилгын явцад ашигласан 179 метрийн кран тухайн үед хотын хамгийн өндөр “түр бүтэц” болж байв

●    Бүх талууд тэнцүү тул орон сууц бүр бараг ижил чанартай харагдацтай “ шударга төлөвлөлт”

●    Дээд давхраас хот төдийгүй Баруун Мидландсын бүс хүртэл харагдана

●    Геометрийн шийдэл нь салхины даралтыг тарааж, савлалт болон ачааллыг бууруулдаг.

Гэхдээ энэ бүх онцлог шийдэл санамсаргүй бий болоогүй, түүний ард зоригтой архитектурын шийдвэр бий.

Архитектурын ялалт

The Octagon-ийн түүх бол Бермингем хотын зүрхэн хэсэгт орших "Paradise" бүсийг шинэчлэн амьдруулах, хотынхоо өнгө төрхийг дэлхийн тавцанд гаргах гэсэн агуу мөрөөдлөөс эхтэй. Өмнө нь "Paradise Circus" гэж нэрлэгддэг байсан, голдуу оффисын барилгууд давамгайлсан энэ орчинд нэгэн томоохон сорилт тулгарсан нь: "Ажил, бизнес төвлөрсөн энэ зүрхэнд хүмүүсийг хэрхэн амьдрахыг хүсэх газар болгох вэ?" гэх асуулт байлаа. 

Энэхүү асуулт л архитектурын суут шийдлийн эхлэл болсон юм

Glenn Howells Architects-ийн баг 2020 онд анхны концепцоо боловсруулахдаа олон янзын геометр дүрс туршиж үзсэний эцэст найман өнцөгт хэлбэр дээр тогтжээ. Энэ нь цонхны талбайг нэмэгдүүлж, байгалийн гэрлийг өрөө бүрт жигд түгээх замаар амьдрах орчны чанарыг бодитоор сайжруулах хамгийн оновчтой, инженерийн нарийн шийдэл байв.

Төслийн хувь заяа 2021 онд хотын зөвлөлөөс санал нэгтэйгээр батлагдаж, дэлхийн хөрөнгө оруулалтын аварга загас гэгддэг CDL компани нэгдсэнээр бодит бүтээн байгуулалт эрчээ авсан билээ. Барилгын явцад ашигласан 179 метр өндөр аварга кран хотын хаанаас ч харагдаж байсан нь төслийн цар хүрээг зарлаж байлаа. Ингээд 2024 оны 9-р сард барилга үндсэн өндөртөө хүрч, "Topping-out" ёслолоор баяраа тэмдэглэсэн бол 2025 онд ашиглалтад орсноор The Octagon нь Бермингем хотыг дэлхийн архитектурын инновацийн төв болгож, шинэ эриний Архитектурын ялалтыг гэрчлэх барилга болон хувирсан юм.

Бермингемийн "Найман өнцөгт"

“The Octagon”-ийн жинхэнэ “ид шид” нь түүний хэлбэрт оршдог. Найман өнцөгт төлөвлөлт нь анх харахад энгийн геометр мэт боловч цаанаа маш нарийн тооцоолол, инженерийн логик агуулдаг.

Энэ хэлбэр нь барилгын гадна ханын уртыг нэмэгдүүлж, айл бүр илүү өргөн фасадтай болох боломжийг олгодог. Үүний үр дүнд орон сууц бүр илүү том цонхтой, илүү нээлттэй, гэрэл сайтай орчинтой болдог. Өдрийн турш нарны гэрэл өрөөнүүдэд жигд тархаж, хиймэл гэрлийн хэрэгцээг бууруулна.

Мөн өндөр барилгад хамгийн том сорилт болдог салхины ачааллыг энэ хэлбэр ухаалгаар шийддэг. Салхи нэг чиглэлд төвлөрөхгүй, харин олон тал руу задран тархдаг тул барилгын тогтвортой байдал сайжирдаг.

Дотоод зохион байгуулалт ч адил оновчтой. Барилгын төв хэсэгт бүх инженерийн системийг нэгтгэсэн “цөм” байрлах бөгөөд үүнээс бүх орон сууц руу шугам сүлжээ тархдаг. Энэ нь ашиггүй зайг багасгаж, үлдсэн орон зайг бүрэн утгаар нь амьдрахад зориулах боломжийг бүрдүүлжээ.

Амьдрах урлаг

The Octagon бол амьдрах орчны шинэ стандарт юм. Нийт 364 айлын орон сууцтай энэ цамхагт давхар бүрд цөөн тооны айл байхаар төлөвлөсөн нь оршин суугч бүрд илүү хувийн орон зай, тайван орчныг мэдрүүлдэг. Айл бүр гадагш харсан байрлалтай тул “харагдацгүй” орон сууц гэж бараг байхгүй.

Дээд давхруудад байрлах орон сууцууд жинхэнэ утгаараа онцгой гэж хэлж болно. Цонхоор харахад хот бүхэлдээ харагдаж, өглөөний нар, оройн гэрэл, шөнийн хотын чимэглэл гээд өдөр бүр өөр өөр дүр зураг нээгдэнэ.

Мөн оршин суугчдын өдөр тутмын хэрэгцээг бодолцсон олон үйлчилгээ нэг дор төвлөрсөн:

●    Тав тух, амралтын орчин

●    Ажиллах зориулалттай нийтийн орон зай

●    Фитнесс, wellness төв

●    Хувийн уулзалт, зоогийн өрөөнүүд

●    24 цагийн үйлчилгээний ажилтан

Энэ бүхнээс харахад The Octagon нь жинхэн утгаараа Амьдрах урлаг гэж хэлж болно.

Маргаашийн төлөөх инженерчлэл

Орчин үеийн өндөр барилга зөвхөн сүрлэг өндөр байх нь хангалтгүй бөгөөд ухаалаг, хариуцлагатай байх ёстой гэсэн зарчмыг The Octagon бүрэн утгаар нь хэрэгжүүлсэн юм. Энэхүү барилга нь ирээдүй хойчдоо өвлүүлэн үлдээх экологийн өв болохын тулд бүтээн байгуулалтын эхний өдрөөс л "ногоон" сэтгэлгээ буюу Маргаашийн төлөөх инженерчлэлийг чухалчилсан. Барилгын явцад гарсан материалын хаягдлыг багасгах бодлого нь энэ төслийн хамгийн том давуу тал байсан бөгөөд нийт хаягдлын 30-40 хувийг дахин боловсруулж, талбайн дүүргэлт болон бусад туслах бүтээцэд ашигласан нь байгальд үзүүлэх нөлөөг үлэмж бууруулсан юм. Тухайлбал, фасадын хөнгөн цагаан хүрээ болон шилэн хавтангуудын үйлдвэрлэлийн хаягдлыг үйлдвэрийн дамжлага руу нь буцаан оруулж, нөөцийг хэмнэх "дугуй эдийн засаг"-ийн загварыг бодитоор хэрэгжүүлсэн байна.

The Octagon нь эрчим хүчний хэмнэлтийн суут шийдэл юм. Фасадын нийт талбайн ихэнх хэсгийг эзлэх цонхнууд нь байгалийн гэрлийг орон сууцны гүн рүү чөлөөтэй нэвтрүүлснээр өдрийн цагаар хиймэл гэрэлтүүлгийн хэрэгцээг үлэмж бууруулдаг. Мөн инженерийн системүүд нь ухаалаг мэдрэгчээр тоноглогдсон тул хүн байгаа эсэхийг мэдэрч гэрэлтүүлэг болон халаалтыг автоматаар тохируулдаг байна. Шилэн фасадын өндөр үзүүлэлттэй дулаан тусгаарлалт нь өвлийн улиралд дулаан алдагдлыг хамгийн бага түвшинд барьж, эрчим хүчний зардлыг хэмнэхээс гадна сантехникийн систем нь ууршилт багатай, усны хэрэглээг хянах ухаалаг технологид суурилжээ.

Архитектурын мэргэжилтнүүд энэхүү төслийг "барилгын хаягдал материалыг үр ашигтай ашигласан дээд жишээ" хэмээн үнэлж байгаа нь тохиолдол биш юм. The Octagon нь өндөр нягтралтай хотын төвд тогтвортой, экологид ээлтэй амьдрах шинэ соёлыг авчирч, тэнгэр баганадсан барилгууд ч байгаль дэлхийтэйгээ зохицон "амьсгалах" боломжтойг батлан харуулж байна. Энэхүү хариуцлагатай инженерчлэл нь барилгыг маргаашийн төлөөх ухаалаг хөрөнгө оруулалт болгож байгаа билээ.

Дүгнэлт

The Octagon бол зөвхөн Бермингем хотын орчин үеийн архитектур, инженерийн шийдэл байгаль орчинд ээлтэй технологитой хэрхэн төгс уусаж болохын тод жишээ юм. Найман өнцөгт хэлбэр нь гоо зүй төдийгүй оршин суугчдын тав тух,  эрчим хүчний хэмнэлтийг ухаалгаар шийдэхийн зэрэгцээ бүтцийн аюулгүй байдлыг цоо шинэ түвшинд гаргасан "амьд" архитектур байлаа.

Энэхүү цамхаг ашиглалтад орсноор архитектурын инновацийн чадавхыг дэлхий нийтэд тунхаглан зарлаж, ирээдүйн өндөр барилгын төслүүдэд шинэ стандарт тогтоож байна. The Octagon нь өндөр нягтралтай хотын төвд тогтвортой амьдрах шинэ соёлыг авчирсан, Бермингем хотын хамгийн бахархалт бэлгэ тэмдэг болон үлдэх нь дамжиггүй.

Барилга МН сэтгүүл 2026 оны 04 дүгээр сар 191 дэх дугаараас ...