Эдийн засгийн өсөлтийг дагаад сүүлийн жилүүдэд оффисын зах зээлд хотын төвийн “А” бүс рүү чиглэсэн шилжилт хөдөлгөөн эрчимжиж байгааг салбарын төлөөллүүд онцолж байна. Бизнесүүд үйл ажиллагаагаа төвлөрүүлэх, харилцагчдад ойр байршилд ажиллах шаардлага нэмэгдсэн нь энэхүү хандлагад голлон нөлөөлж байгаа аж.

Сүүлийн үед компаниуд том талбай бүхий оффисоос татгалзаж илүү үр ашигтай, орчин үеийн шийдэлтэй, дэд бүтэц сайтай жижиг талбайг сонгох болсон нь зах зээлийн шинэ чиг хандлага болж байна. Түүнчлэн байршлаас гадна барилгын чанар, эрчим хүчний хэмнэлт, ажиллах орчны тав тух зэрэг үзүүлэлтүүд чухалд тооцогдох болжээ.

Үнийн хувьд төвийн “А” бүсэд оффисын түрээсийн үнэ нэг ам метр нь дунджаар 80–100 мянган төгрөг байгаа бол худалдах үнэ 8–16 сая төгрөгийн хооронд хэлбэлзэж байна. Байршил, барилгын зэрэглэл, үйлчилгээний чанараас шалтгаалан үнийн ялгаа үүсдэг байна.

Чиг хандлагаас харахад, төвийн “А” бүсэд оффисын эрэлт ойрын хугацаанд буюу ирэх 1–3 жилд буурахгүй, үүнийг дагаад үнэ тогтвортой хадгалагдах, цаашлаад бага зэрэг өсөх хандлагатай байгаа аж. 

Ийнхүү оффисын зах зээлд чанар, байршилд суурилсан өрсөлдөөн улам ширүүсэж, үнийн ялгарал илүү тодрох төлөв ажиглагдаж байна.