2026 оны 4 дүгээр сарын 13-нд олон улсын хөрөнгө оруулалтын тэргүүлэгч компани болох KKR & Co.-ийн Япон дахь охин компани KJRM Holdings зах зээл дэх байр сууриа тэлэх зорилгоор үл хөдлөх хөрөнгийн худалдан авалтаа эрчимжүүлэхээ мэдэгдлээ. 

Тус компани Японы корпорациудын эзэмшиж буй үндсэн бус хөрөнгө болон борлуулахаар гаргаж буй объектуудыг голчлон онилж байгаа бөгөөд энэхүү зах зээлийн боломжит багтаамжийг ойролцоогоор 450 их наяд иен (2.8 их наяд ам.доллар) гэж үнэлж байна.

Сүүлийн жилүүдэд Японы Засгийн газар болон хөрөнгө оруулагчид дотоодын компаниудаасаа үйл ажиллагаагаа шинэчлэхийг шаардах болсон. Тодруулбал, компаниуд үндсэн бизнесээсээ гадуурх, ашиглалт багатай үл хөдлөх хөрөнгүүдээ зарж, олсон мөнгөө бизнесээ өргөжүүлэхэд зарцуулах шахалтад орж байна. Энэхүү нөхцөл байдал нь KKR & Co.-ийн хувьд хямд бөгөөд чанартай хөрөнгө худалдаж авах боломж болж байна. 

KJRM Holdings-ийн гүйцэтгэх захирал Наоки Сүзүкигийн мэдэгдснээр, тэдний эзэмшиж буй үл хөдлөх хөрөнгийн багц 2025 онд 20 хувиар өсөж, 2.53 их наяд иенд хүрсэн нь тус улс дахь хамгийн том хөрөнгийн багцуудын нэг болсон байна.

Тэрээр энэхүү идэвхтэй худалдан авалт болон зах зээлийн таатай нөхцөл байдал цаашид 3-аас 5 жил үргэлжлэх төлөвтэй байгааг онцолсон бөгөөд KKR & Co. цаашид ч Японы үл хөдлөх хөрөнгийн зах зээлд тэргүүлэгч байр сууриа бэхжүүлэхээр ажиллаж байна.