Монгол Улсын Ерөнхий сайдын ивээл дор барилгын салбарын “ЧӨЛӨӨЛЬЕ” хэлэлцүүлэг 2026 оны 4 дүгээр сарын 10-ны өдөр Барилгын хөгжлийн төвд боллоо. 

Тус хэлэлцүүлэгийг Хот Байгуулалт, Барилга, Орон Сууцжуулалтын Яам (ХББОСЯ), Барилгын хөгжлийн төв ТӨҮГ болон “Yes Mongolia” ТББ хамтран зохион байгуулсан бөгөөд төр, хувийн хэвшил, мэргэжлийн холбоод, инженер техникийн ажилтнууд болон судлаачдын төлөөлөл оролцож, салбарт тулгамдаж буй асуудлуудыг шийдвэрлэх бодит гарцуудыг тодорхойлсон юм.Салбарын үйл ажиллагааг эрх зүйн хувьд боловсронгуй болгох хүрээнд дараах хуулийн төслүүдийг УИХ-д өргөн барихаар ажиллаж буйг ХББОС-ын зөвлөх И.Баттөгс энэ үеэр танилцууллаа.

• Барилгын ерөнхий хууль болон Хот байгуулалтын тухай хуулийн шинэчилсэн найруулга;
• Орон сууцжуулалтын тухай болон Орон сууцны санхүүжилтийн банкны тухай анхдагч хуулиуд.

Эдгээр хуулийн шинэчлэл нь барилгын норм, стандартыг олон улсын жишигт нийцүүлж, шинэ технологи, материалын хэрэглээг дэмжих замаар салбарын өрсөлдөх чадварыг нэмэгдүүлэх суурь болох юм.

Мөн аж ахуйн нэгжүүдийн хувьд хамгийн их хүлээлт үүсгээд байсан асуудал болох зөвшөөрөл олголтын үйл явцыг шинэчлэх талаар онцлон дурдлаа. Өмнө нь дунджаар 30 хоног шаарддаг байсан зөвшөөрлийн процессыг бүрэн цахимжуулснаар 1–3 хоногийн дотор шийдвэрлэх техникийн боломж бүрдэж байгааг тэмдэглэв.

Хэлэлцүүлгийн төгсгөлд оролцогчдын санал, зөвлөмжийг нэгтгэн дүгнэж, цаашид хэрэгжүүлэх бодлогын баримт бичиг, шийдвэр гаргалтад тусгах суурийг бүрдүүллээ. Түүнчлэн салбарын үйл ажиллагааг хялбаршуулах, бизнесийн орчныг сайжруулахад чиглэсэн “чөлөөлөлт”-ийн бодлогыг үе шаттай хэрэгжүүлэх, төр-хувийн хэвшлийн хамтын ажиллагааг ил тод, шуурхай, үр ашигтай тогтолцоонд шилжүүлэх шаардлагатай гэдэг дээр талууд санал нэгдсэн юм.Ингэснээр уг хэлэлцүүлэг нь барилгын салбарын хөгжлийг шинэ шатанд гаргах, эрх зүйн болон институцийн шинэчлэлийг эрчимжүүлэхэд чухал ач холбогдолтой арга хэмжээ боллоо.