Хот Байгуулалт, Барилга, Орон Сууцжуулалтын яам, Монголын орон сууц, нийтийн аж ахуйн үйлчилгээний ажилтны үйлдвэрчний эвлэлийн холбоо, Монголын нийтийн аж ахуйн үйлчилгээний холбоо хамтран орон сууц, нийтийн аж ахуйн салбарын 2026–2028 оны гурван талт хамтын хэлэлцээрийг 2026 оны 4 дүгээр сарын 10-нд  байгууллаа.  

Тус хэлэлцээр нь салбарын хөгжлийг дэмжих зорилготой бөгөөд нийт 9 бүлэг, 63 зорилтыг хэрэгжүүлэхээр тусгасан байна.

Үүнд:

• Салбарын хүний нөөцийг бэлтгэх, мэргэшүүлэх, ур чадварыг дээшлүүлэх
• Ажилтнуудын хөдөлмөрийн нөхцөл, нийгмийн баталгааг сайжруулах
• Цалин хөлс, урамшууллын тогтолцоог боловсронгуй болгох
• Нийтийн аж ахуйн үйлчилгээний чанар, хүртээмжийг нэмэгдүүлэх
• Үйлдвэр, барилга байгууламжийг шинэчлэх, техник технологийн дэвшил нэвтрүүлэх
• Үйл ажиллагааг автоматжуулах, дижитал шилжилтийг эрчимжүүлэх
• Хөдөлмөрийн аюулгүй байдал, эрүүл ахуйн шаардлагыг хангах
• Байгаль орчинд ээлтэй, тогтвортой хөгжлийн бодлого хэрэгжүүлэх
• Төр, хувийн хэвшлийн түншлэлд тулгуурласан хөрөнгө оруулалтыг нэмэгдүүлэх

Хэлэлцээр байгуулах үеэр Хот Байгуулалт, Барилга, Орон Сууцжуулалтын яамны сайд Э.Бат-Амгалан салбарын хүний нөөцийг чадавхжуулах, нийтийн аж ахуйн байгууллагуудын барилга байгууламжийг орчин үеийн дэвшилтэт техник, технологид суурилсан автоматжуулсан, хүнээс хамаарал багатай системд шилжүүлэхэд анхаарч ажиллана гэдгийг онцолсон.

Мөн төр, хувийн хэвшлийн түншлэлд тулгуурласан дэд бүтцийн хөрөнгө оруулалтыг нэмэгдүүлэх эрх зүйн болон санхүүгийн орчныг бүрдүүлэхэд онцгой анхаарч ажиллахаа илэрхийллээ. Энэхүү гурван талт хамтын хэлэлцээр нь салбарын үйл ажиллагааг шинэ шатанд гаргах, үйлчилгээний чанар, хүртээмжийг сайжруулах, байгууллагуудын үр ашиг, бүтээмжийг нэмэгдүүлэхэд чухал ач холбогдолтой гэж үзэж байна.