Төрөөс баталсан шинэ журмын дагуу төрийн өмчийн орон сууцны түрээсийн үнийг иргэдийн орлоготой уялдуулан м² тутамд 11,000–15,000 төгрөгийн хооронд тогтоохоор 2026 оны 3 дугаар сарын 20-нд шийдвэрлэлээ. 

Энэ нь зах зээлийн ханшаас дунджаар хоёр дахин хямд түвшин бөгөөд зорилтот бүлгийн иргэдийн орон сууцны хүртээмжийг нэмэгдүүлэхэд чиглэж байна. Журмын хүрээнд төрийн өмчийн орон сууцыг иргэдэд түрээслүүлэхээс гадна өмчлүүлэх, борлуулах, мөн дахин төлөвлөлтийн үед орон сууцаар солих болон түр хугацаанд байрлуулах зэрэг олон хэлбэрээр ашиглуулах зохицуулалтыг тусгасан. 

Түүнчлэн залуу гэр бүл, төрийн албан хаагч, ахмад настан, олон хүүхэдтэй болон өрх толгойлсон гэр бүл, хөгжлийн бэрхшээлтэй иргэдийг тодорхой квотоор хамруулах бөгөөд төрийн үйлчилгээний ажилтан 25 хувь, төрийн албан хаагч 15 хувь, ахмад настан 18 хувь, хөгжлийн бэрхшээлтэй иргэд 10 хувийг эзлэхээр тусгажээ.

Сонгон шалгаруулалтыг цахим хэлбэрээр, төрийн мэдээллийн нэгдсэн системд тулгуурлан ил тод зохион байгуулах бөгөөд өөрийн нэр дээр орон сууц эзэмшдэг иргэн хамрагдах боломжгүй юм. Ингэснээр бодит хэрэгцээтэй иргэдийг илүү оновчтой тодорхойлох нөхцөл бүрдэхээр байна.

Энэхүү журам хэрэгжиж эхэлснээр “Ногоон нуур-1008 айл”, “Солонго-1,2”, “Залуус-1” зэрэг төрийн орон сууцны төслүүдэд иргэдийг нэгдсэн бодлогоор хамруулах боломж бүрдэнэ.

Тухайлбал, “Ногоон нуур-1008 айл” төслийн түрээс 594,000–653,400 төгрөг байхад тухайн бүсэд ижил хэмжээний 2 өрөө орон сууц 1.5–1.8 сая төгрөгийн үнэтэй байгаа нь төрийн зохицуулалт бодитоор иргэдийн зардлыг бууруулах боломжтойг харуулж байна.