Монгол Улсад орчин цагийн барилгын салбар үүсэж хөгжсөний 100 жилийн ойг тохиолдуулан барилгын материал, үйлдвэрлэлийн чиглэлийн суурь мэдлэгийг нэгтгэсэн “Барилгын үйлдвэр, барилгын материалын аж үйлдвэр” нэртэй  НЭВТЭРХИЙ ТОЛЬ анх удаа монгол хэл дээр хэвлэгдэн гарлаа.

Энэхүү бүтээл нь ОХУ-ын барилга, барилгын материалын салбарын туршилт, эрдэм шинжилгээ, зураг төсөл, сургалт, үйлдвэрлэлийн тэргүүлэх байгууллагуудын эрдэмтэн, судлаач, мэргэжилтнүүдийн хамтын судалгаанд тулгуурласан шинжлэх ухаан–үйлдвэрлэлийн лавлагааны томоохон бүтээлүүдийн нэг юм. 

Уг нэвтэрхий толийг Монгол Улсын гавьяат барилгачин, барилгын материалын зөвлөх инженер О.Мэлсчо монгол хэлнээ орчуулж, хянан тохиолдуулсан байна. 

Нэвтэрхий толь нь манай орны барилга, архитектур, барилгын материалын үйлдвэрлэлийн салбарын инженер техникийн ажилтнууд, мэргэшсэн ажилчид, мөн их, дээд сургууль, коллеж, мэргэжлийн боловсрол, сургалтын байгууллагын багш, оюутнуудад зориулсан суурь гарын авлага болох юм. Тус бүтээлд  барилга байгууламж, барилгын материал хийцийн технологийн чухал үйлдвэрүүд, машин техникийн талаарх үндсэн ойлголт, нэр томьёоллыг нарийвчлан тайлбарласан байна. 

Нэр томьёоллын талаарх ойлголт нь барилгын материалын аж үйлдвэрийн болон ерөнхий техникийн шинж чанарын асуудлуудыг /тухайлбал: бетон, дүргэгч, холбогч, металл, мод, шил, керамик, полимер, дулаан ба ус, дуу чимээ тусгаарлах, дээврийн материалуудын г.м/бүрэн хамарсан байна. Мөн сэдэв бүрд багаж хэрэгсэл, машин мехнизм, байгууламжийн ойлголт, нэр томьёоны тодорхойлолт, хэрэглээний зориулалт, техникийн үйлдлийн товч бичлэг зэрэг нь тодорхой тусгагдсан.

Тус нэвтэрхий тольд нийт 726 сэдвийг багтаасан бөгөөд үүнээс:

• Түүхий эд материал – 50
• Барилгын материал, хийц эдлэл – 562
• Үйлдвэрийн тоног төхөөрөмж, багаж хэрэгсэл – 34
• Үйлдвэрлэлийн арга технологи – 55
• Бусад – 27 сэдвээр тус тус ангилан тайлбарласан байна.

Сэдвүүдийг монгол цагаан толгойн дарааллаар байрлуулж, тухайн ойлголтын тодорхойлолт, мөн чанар, технологийн онцлог, хэрэглээг судалгаанд тулгуурлан тайлбарласнаас гадна шаардлагатай хэсгүүдэд зураг, схем, бүдүүвчийг хавсаргажээ. Мөн зарим нэр томьёоны уялдаа холбоог харуулах зорилгоор холбогдох сэдвүүд рүү чиглэсэн заалтуудыг оруулсан байна. 

Орчуулгын хувьд монгол хэлний ойлгомж, хэрэглээний онцлогт нийцүүлэх зарчмыг баримталсан. Гэхдээ урьд нь монгол хэлэнд хэрэглэж хэвшсэн гадаад нэр томьёоны үгнүүд /жишээлбэл: бетон, цемент, керамик г.м/болон орос хэлэнд эртний латин хэлнээс орж хэрэглэгдэж байгаа улмаар Монгол хэлэнд хөрвүүлэхэд утга, хэллэгийн талаасаа зохимж муутай үгнүүдийг орчуулгагүйгээр Монгол хэлний бичлэгт зохицуулж оруулсан. Иймд гадаад үгсийн /голлох нэр томьёоны/ утгачилсан орчуулгын жагсаалтыг гаргаж номонд хавсаргажээ.

Энэхүү нэвтэрхий толийг салбарын 100 жилийн ойд зориулан эрхлэн гаргасан төдийгүй барилгын салбарын хөгжилд үнэтэй хувь нэмэр оруулсан ахмад удирдлага, мэргэжилтнүүдийн гэгээн дурсгалыг мөнхжүүлэхэд чиглэсэн бүтээл болж байгаараа онцлог юм.

Холбоо барих: 91997332, 99101001