Засгийн газрын 2026 оны 3 дугаар сарын 18-ны өдрийн ээлжит хуралдаанаар Орон сууцны дундын өмчлөлийн эд хөрөнгийн тухай хуулийн шинэчилсэн найруулгын төслийг хэлэлцэн дэмжиж, Улсын Их Хуралд өргөн мэдүүлэхээр шийдвэрлэлээ.

Сүүлийн жилүүдэд иргэд, сууц өмчлөгчдийн холбоо (СӨХ)-ны хооронд үүсдэг маргаан, дундын өмчлөлийн ашиглалт, засвар үйлчилгээний тодорхойгүй байдал нэмэгдэх болсонтой холбоотойгоор энэхүү эрх зүйн шинэчлэлийг хийх шаардлага үүссэн юм. Одоогийн мөрдөгдөж буй зохицуулалт нь практик дээр хэрэгжихэд хийдэлтэй, хариуцлагын тогтолцоо сул байгааг иргэд болон мэргэжлийн байгууллагууд шүүмжилсээр ирсэн.

Шинээр боловсруулсан хуулийн төсөлд дундын өмчлөлийн эд хөрөнгийн зааг ялгааг нарийвчлан тогтоож, эзэмшил, ашиглалт, засвар үйлчилгээний журмыг илүү тодорхой болгожээ. Ялангуяа СӨХ-ны үйл ажиллагааг ил тод, нээлттэй болгох, санхүүжилтийн эх үүсвэрийг оновчтой тодорхойлох, оршин суугчдын эрх, үүргийг тэнцвэржүүлэх заалтуудыг тусгасан байна. Ингэснээр орон сууцны орчны аюулгүй байдал сайжирч, үл хөдлөх хөрөнгийн үнэ цэнэ хадгалагдах, иргэдийн оролцоо, хариуцлага дээшлэх ач холбогдолтой гэж үзэж байна.

УИХ-д өргөн мэдүүлсний дараа хуулийн төслийн хэлэлцүүлгийн шатанд иргэд, олон нийтийн саналыг албан ёсоор авах бөгөөд энэхүү шинэчлэл нь хот суурин газрын иргэдийн амьдрах орчны чанарыг сайжруулахад чиглэсэн чухал алхам болох юм.