Улаанбаатар хотын ус хангамжийг нэмэгдүүлэх зорилготой “Усны Компакт” гэрээний хүрээнд хэрэгжиж буй томоохон төслүүдийн нэг болох Хаягдал ус дахин боловсруулах үйлдвэр төлөвлөсөн хугацаандаа ашиглалтад орж, үйл ажиллагаагаа эхлүүллээ.

Энэхүү хөтөлбөрийн хүрээнд:

• Жилд 50 сая м³ ус нийлүүлэх хүчин чадалтай ус гүн цэвэршүүлэх үйлдвэр

• Жилд 18 сая м³ цэвэрлэсэн усыг дахин ашиглах боломжтой хаягдал ус дахин боловсруулах үйлдвэр байгуулахаар төлөвлөсөн байна.

Шинэ үйлдвэр нь Монгол Улсад анх удаа аж үйлдвэрийн зориулалтаар хаягдал усыг дахин боловсруулж буй онцлогтой. Тодруулбал, шинэ Төв цэвэрлэх байгууламжаас хоногт гарч буй 250 мянган м³ цэвэрлэсэн уснаас 50 мянган м³-ийг хүлээн авч, дахин боловсруулан дулааны цахилгаан станцуудын техникийн хэрэгцээнд нийлүүлэх юм.

Ингэснээр гүний цэнгэг усны хэрэглээг бууруулж, ирээдүйд ашиглах усны нөөцийг хамгаалах чухал ач холбогдолтой.

Мөн энэхүү төсөл нь:

• уул уурхай

• автозам, дэд бүтцийн бүтээн байгуулалт

• хөдөө аж ахуй

• байгаль орчны нөхөн сэргээлт

• ногоон байгууламжийн усалгаа

• зам талбайн угаалга зэрэг салбарт хаягдал усыг дахин ашиглах жишиг тогтоох суурь болж байна.