Монгол Улсын Засгийн газрын 2026 оны 3 дугаар сарын 17-ны өдрийн хуралдаанаар “Лифтний аюулгүй байдлын техникийн зохицуулалт”-ыг хэлэлцэн баталлаа. 

Энэхүү зохицуулалт нь хүний амь нас, эрүүл мэнд, эд хөрөнгө болон барилга байгууламжийн аюулгүй байдлыг хангах, лифт ашиглалтын явцад гарч болох аливаа эрсдэлээс урьдчилан сэргийлэх үндсэн зорилготой юм.

Шинэ дүрмээр лифтний ашиглалтын стандарт хугацааг анх ашиглалтад орсноос хойш 25 жилээр тогтоосон нь насжилт өндөр, хуучирсан лифтүүдийг үе шаттайгаар шинэчлэх эрх зүйн чухал үндэслэл болж байна. Мөн лифт болон түүний ослоос хамгаалах төхөөрөмжүүдийг олон улсын стандартын дагуу заавал гэрчилгээжүүлэх тогтолцоог бүрдүүлж, иргэдэд аюулгүй ашиглалтын талаарх мэдээллийг ил тод, ойлгомжтой хүргэх шаардлагыг тусгажээ.

Түүнчлэн энэхүү зохицуулалт нь хөгжлийн бэрхшээлтэй иргэдийн хүртээмжийг сайжруулах, тоног төхөөрөмжийг санаатай эвдрэл гэмтлээс хамгаалах техникийн шийдлүүдийг багтаасан байна.

Ингэснээр лифтний зураг төсөл, үйлдвэрлэл, импорт, угсралтаас эхлээд ашиглалтын хугацаа дууссаны дараах оношилгоо, шинэчлэлт хүртэлх бүх үе шатыг хамарсан нэгдсэн хяналтын тогтолцоо Монгол Улсад албан ёсоор хэрэгжиж эхэллээ.