Америкийн Нэгдсэн Улсад агуулах, логистикийн зориулалттай барилгын зах зээл 2026 онд идэвхтэй хэвээр байна. Судалгаагаар 46 мянган м²-ээс дээш хэмжээтэй том агуулахын гэрээнүүдийн нийт шингээлт 10.8 сая м²-д хүрч, үйлдвэрлэлийн үл хөдлөх хөрөнгийн эрэлт өндөр байгааг харуулж байна.

Эрэлт өсөхөд үйлдвэрлэлийг гадаадаас АНУ руу буцаан шилжүүлэх бодлого, технологийн үйлдвэрлэлийг дэмжих хууль, мөн логистик, цахим худалдааны компаниудын өргөжилт нөлөөлж байна. Түүнчлэн хиймэл оюун ухаанд зориулсан дата төвүүдийн барилга нэмэгдэж байгаа нь том талбайтай агуулах, үйлдвэрлэлийн барилгын хэрэгцээг нэмэгдүүлж байна.

Харин энэ онд шинээр ашиглалтад орох агуулах барилгын хэмжээ 26 сая м² орчим болж, өмнөх жилээс 35 хувиар буурах төлөвтэй байна. Өөрөөр хэлбэл шинэ барилгын нийлүүлэлт багасч байгаа ч зах зээлийн эрэлт 18.6 сая м² орчимд хүрэхээр байна.

Одоогоор агуулахын хоосон талбайн хэмжээ 7.1 хувь орчимд тогтворжсон бөгөөд нийлүүлэлт багасч, эрэлт өндөр хэвээр байгаа тул түрээсийн үнэ аажмаар өсөх хандлагатай байна. Иймээс шинжээчдийн үзэж буйгаар агуулах, үйлдвэрлэл, логистикийн зориулалттай барилга үл хөдлөх хөрөнгийн зах зээлд хамгийн хурдацтай өсөж буй сегментүүдийн нэг хэвээр байх төлөвтэй байна.