Орчин үеийн хотжилт биднийг бетон, хиймэл гэрэл, синтетик материалд хүрээлж, байгалитай холбогдох боломжийг багасгадаг бөгөөд энэ нь хүний сэтгэлзүйд ачаалал үүсгэдэг. Энэхүү орон зайн болон сэтгэл зүйн хоосон орон зайг нөхөхөөр Биофиль (Biophilic) дизайн хэмээх хүний төрөлхийн байгалийн хүсэл сонирхолд суурилсан интерьерийн гүн ухаан хүч түрэн орж ирлээ.

Ихэнхдээ биофиль дизайныг гоёл чимэглэл төдий, эсвэл өрөөндөө хэдэн ургамал байрлуулах тренд гэж ойлгодог. Харин бодит байдал дээр энэ нь хүний сэтгэл зүй, бие махбодын хэрэгцээг орон зайн шийдэлтэй уялдуулсан, шинжлэх ухаанд суурилсан интерьерийн хандлага юм. Habitarmonia академийн үүсгэн байгуулагч, дизайнер Нуриа Муноз үүнийг дараах байдлаар тодорхойлсон байдаг:

"Жинхэнэ биофиль орчин гэдэг нь зөвхөн нүдэнд харагдах ногоон ургамлаар хязгаарлагдахгүй, хүний бүх мэдрэхүйд нөлөөлөх орон зайг бүтээх тухай юм. Өдрийн турш өөрчлөгдөх байгалийн гэрлийн тусгал, мод болон чулууны органик бүтэц, агаарын зөөлөн урсгал, газрын дулаан өнгөнүүд нь хүнийг тайвшруулж, дотоод эрч хүчийг сэргээдэг. Энэ нь Жапандигийн дулаан минимализм, Ваби-сабигийн төгс бус гоо зүй, Скандинавын загварын тайтгаруулдаг шинж чанаруудыг нэгэн цэгт зангидсан амьд мэдрэмж юм."

Иймд биофиль интерьер нь гагцхүү гоо зүйн шийдэл төдий бус, байгалийн элементүүдийг орон зайн инженерчлэлтэй нэгтгэснээр хүний сэтгэл, оюун санааг анагааж, хотын чимээ шуугиан дунд "амар амгалангийн баянбүрд"-ийг цогцлоож буй хамгийн хүмүүнлэг  чиг хандлага юм.

Биофиль интерьер гэж юу вэ? Биофиль интерьер нь хүний төрөлхийн байгалийн хүсэл сонирхолд суурилсан дотоод орчны шийдэл юм. Энэ нь байгалийн гэрэл, органик бүтэц, ургамал, усны элементүүдийг орон зайд оруулснаар амралт, тайвшрал мэдрэмжийг бий болгож, хүний сэтгэл зүйд эерэг нөлөө үзүүлдэг. “Biophilia” гэдэг нь “амьдралд хайртай байх” гэсэн утгатай бөгөөд хүний төрөлхийн хэрэгцээг интерьерээр хангахыг илэрхийлнэ.

Судалгаагаар байгалийн элементүүдийг дотоод орчинд уялдуулан ашиглах нь хүний стрессийг бууруулж, анхаарал төвлөрөл болон бүтээмжийг 10–15 хувиар нэмэгдүүлдэг болохыг нотолжээ.

Биофиль дизайныг интерьерт хэрэгжүүлэх 3 үндсэн зарчим

1. БАЙГАЛЬТАЙ ШУУД ХОЛБОГДОХ 

Орон зайд амьд, бодит байгалийн элементүүдийг оруулахыг хэлнэ. Үүнд байгалийн гэрэл, цэвэр агаарын урсгал, амьд ургамал, усны элементүүд багтдаг. Эдгээр нь хүний мэдрэхүйд шууд нөлөөлж, тайвшрал, дотоод тэнцвэрийг бий болгодог.

2026 оны онцлох шийдлүүд:

●    Амьд хана (living wall): Өрөөний нэг ханыг бүрэн ургамлаар бүрхэж гоёл чимэглэл гадна, агаар, гэрэл, дулаантай уялдаж орон зайд амьд мэдрэмж, тайвшрал авчирдаг.

●    Hydroponics технологи: Хөрсгүй ургамал ургуулах Hydroponics нь дотоод орчинд ногоон байгууламж бий болгож, тоосжилт, шороо үүсгэхгүйй рчин үеийн шийдэл юм.

●    Circadian lighting буюу гэрэлтүүлэг: Хүний биологийн цагтай нийцсэн гэрэлтүүлэг нь өдрийн турш байгалийн гэрлийн өөрчлөлтийг дуурайж, анхаарал төвлөрөл, сэргэлт болон амралтыг дэмждэг.

●    Байгалийн агаарын урсгалыг дэмжсэн нээлттэй төлөвлөлт: Урсгалтай, нээлттэй орон зай нь агаарын чанар, тав тухыг нэмэгдүүлж, хүний сэтгэл зүйд тайвшрал авчирдаг.

2. БАЙГАЛЬТАЙ ШУУД БУС ХОЛБОГДОХ 

Байгалийн хэлбэр, бүтэц, өнгийг интерьерийн материал, дизайн шийдлээр дамжуулан илэрхийлэхийг хэлнэ.

2026 оны онцлох шийдлүүд:

●    Муруй хэлбэртэй тавилга, арк, интерьерийн детал: Байгалийн шугамыг дуурайж, орон зайг уян хатан, амьд мэдрэмжтэй болгож, хүний сэтгэл зүйд тайвшрал, тав тухыг авчирдаг.

●    Байгалийн гаралтай материал: Мод, чулуу, маалинга, олсон нэхмэл зэрэг амьсгалдаг материалууд нь орон зайг илүү байгалийн, тайван уур амьсгалтай болгодог. Тэдгээрийн текстур, хүрэлцэх мэдрэмж нь сэтгэл зүйн эерэг нөлөө үзүүлдэг.

●    Байгалийн өнгөнүүд: Элсэн шаргал, хөвдөн ногоон, шаварлаг улаан зэрэг өнгөнүүд нь дулаан, тайвшруулах уур амьсгалыг бүрдүүлж, хүний сэтгэл зүйд эерэг нөлөө үзүүлнэ.

3. ОРОН ЗАЙН БҮТЭЦ: 

Интерьер төлөвлөлтөд хүнийг аюулгүй, тухтай мэдрүүлэх булан, жижиг хэсэгийг “хоргодох орон зай” гэж нэрлэдэг. Харин өрөөг бүхэлд нь харах боломжтой төв хэсгийг “харах орчин” гэнэ. Эдгээрийг тэнцвэртэй хослуулах нь хүнийг тайван, аюулгүй мэдрэмж төрүүлж, орон зайг илүү тав тухтай болгодог.

2026 оны онцлох шийдлүүд:

●    Урсгалтай, нээлттэй орон зайн зохион байгуулалт: Өрөөнүүдийг хана, хаалт багатай, нэг хэсгээс нөгөө хэсэг рүү чөлөөтэй нэвтрэх боломжтой болгох нь байгалийн агаарын урсгал, гэрлийг өрөөнд нэвтрүүлэх, орон зайг илүү амьд, тав тухтай болгодог.

●    Хурц өнцөггүй, зөөлөн шилжилттэй төлөвлөлт: Муруй, дугуй хэлбэртэй шугам, арк, зөөлөн шилжилт бүхий зохион байгуулалт нь хүний сэтгэлд тайвшрал өгч, орон зайг илүү уян зөөлөн болгож, дотоод мэдрэмжийг дэмждэг.

●    Байгалийн гэрэл, харааны мэдрэмжийг нэмэгдүүлэх шийдлүүд: Том цонх, шилэн фасад, гэрлийн тусгал, янз бүрийн өндөртэй тавилга зэрэг элементүүд нь өрөөний байдал, гэрэл, сүүдрийн харьцааг нэмэгдүүлж, хүний харааны мэдрэмжийг байгальтай илүү холбогдсон мэдрэмжийг төрүүлдэг.

Биофиль МонголдБиофиль интерьерийг хэрэгжүүлэхийн тулд заавал их хэмжээний засвар, өндөр зардал шаардагдахгүй. Энгийн боловч ухамсартай өөрчлөлтүүд л хангалттай.  Монголын нөхцөлд жилийн ихэнх сарууд саарал, хүйтэн төдийгүй өвлийн улирал харьцангуй урт байдаг тул биофиль интерьер сэтгэл зүйн бодит дэмжлэг үзүүлэх “сэтгэл заслын орон зай” болж чадна. 

Жишээ нь “Өвлийн цэцэрлэг”: Тагт, балкон эсвэл өрөөний жижигхэн хэсэгт дулаалгатай, жилийн турш ногооноороо байх “амьд” орон зайг бий болгож болно. Цонхны гэрлийг аль болох дээд хэмжээнд оруулах, жижиг усан оргилуур байрлуулах, арчилгаа багатай ургамлуудыг сонгох нь орчны амьд мэдрэмжийг нэмэхэд тусална.

Мөн хуванцар, хиймэл материалуудыг мод, шавар, шаазан гэх мэт байгалийн гаралтай материал, газрын өнгөнүүд (элсэн шаргал, хөвдөн ногоон, шаварлаг улаан) ашиглан сольсноор дулаан, тайван уур амьсгалыг бүрдүүлж, хотын хүйтэн, саарал орчныг сэтгэлд эерэгээр нөлөөлөх “байгалийн ой санамж”-тай орчин болгох боломжтой.

Энэхүү жижиг орон зай хотын стресс, стрессийн дааврыг бууруулахад бодит нөлөө үзүүлэх болно.

# 2026 онд гэрийн интерьер гоё харагдахаас давж, хүний мэдрэхүй, сэтгэл зүйд нөлөөлөх, амьдралыг илүү таашаах орон зайг бүтээх рүү чиглэж байна.

Барилга МН сэтгүүлийн 189 дэх дугаараас...