2026 оны хоёрдугаар сарын эцсийн байдлаар ипотекийн зээлийн шийдэгдээгүй хүсэлтийн хэмжээ 5.5 их наяд төгрөгт хүрч хуримтлагдсан талаар Монголбанк мэдээллээ. Энэ нь орон сууцны ипотекийн зээлийн эрэлт өндөр хэвээр байгааг илтгэж байгаа бөгөөд хүлээгдэж буй хүсэлтийн хэмжээ ийнхүү нэмэгдсэн байна.

Засгийн газар 2026 онд Хуримтлалын сангаас хөрөнгө оруулалт хийсэн тохиолдолд тус сан, Монголбанк болон арилжааны банкуудын эх үүсвэрээр ипотекийн зээлийн хөтөлбөрийн хүрээнд нийт нэг их наяд орчим төгрөгийн зээл олгохоор төлөвлөжээ.

2025 онд дээрх эх үүсвэрүүдээр нийт 1.1 их наяд төгрөгийн ипотекийн зээлийг 9000 гаруй өрхөд олгосон байна. Харин ипотекийн зээлийн хөтөлбөр хэрэгжиж эхэлснээс хойш буюу 2013 оноос 2026 оны хоёрдугаар сар хүртэл нийт 140 мянга орчим зээлдэгчид зээл авчээ. 

Монголбанкны тайлангаас харахад ипотекийн зээлийн нийт үлдэгдэл хоёрдугаар сарын эцэст 11.5 их наяд төгрөгт хүрсэн байна. Үүний 4.6 их наяд төгрөгийг Төв банкны өөрийн эх үүсвэрээс санхүүжүүлсэн бол 1.4 их наяд төгрөг нь зургаан хувийн хүүтэй зээлийн санхүүжилтийн хүрээнд олгогджээ. 

Мөн нийслэлийн “Сэлбэ дэд төв”-д Нийслэлийн ипотекийн сан байгуулж, орон сууцны зээл олгох боломжийг судалж байгааг Х.Нямбаатар мэдээлсэн байна. Уг сангаас эмч, багш нарт 10 хувийн урьдчилгаатай, бусад иргэдэд 20 хувийн урьдчилгаатай, найман хувийн хүүтэй, 15 жилийн хугацаатай зээл олгох хувилбарыг судалж байгаа аж.