БНХАУ-ын гангийн үйлдвэрлэл сүүлийн хоёр жил дараалан буурч, 2025 онд 960.8 сая тоннд хүрч өмнөх оноос 4.4 хувиар агшсан байна. 2024 онд мөн гангийн үйлдвэрлэл 1.7 хувиар буурсан нь тус салбарын бууралтын хандлага үргэлжилж байгааг харуулж байна.

Гангийн үйлдвэрлэлийн бууралт нь тус улсын үл хөдлөх хөрөнгийн салбарын идэвхжил сулрах, дотоодын эрэлт саарах зэрэг хүчин зүйлстэй холбоотой гэж шинжээчид үзэж байна. Үүнтэй холбоотойгоор гангийн түүхий эдийн хэрэглээ, ялангуяа коксжих нүүрсний эрэлтэд тодорхой хэмжээнд нөлөөлж байгаа юм.

Гангийн үйлдвэрлэл буурсантай зэрэгцэн нүүрсний хэрэглээ мөн буурч, дэлхийн зах зээлд нүүрсний үнэ уналтад ороход нөлөөлж байна. Өнгөрсөн онд БНХАУ сард дунджаар 78.9 сая тонн нүүрс үйлдвэрлэсэн нь 2023 оны 85.2 сая тонноос мэдэгдэхүйц багассан үзүүлэлт болжээ.

Харин Монгол Улсын нүүрсний экспорт сүүлийн жилүүдэд өсөх хандлагатай байна. Тухайлбал, 2025 онд Монгол Улс сард дунджаар 7.5 сая тонн нүүрс экспортолж, жилийн эцэст нийт экспорт 90 орчим сая тоннд хүрсэн нь өмнөх оноос 7.4 хувиар өссөн дүн болсон байна.

Мөн БНХАУ-ын коксжих нүүрсний импортын 51 орчим хувийг Монгол Улс дангаараа нийлүүлж байгаа нь Монголын нүүрсний экспорт тус улсын гангийн үйлдвэрлэлтэй нягт уялдаатай бөгөөд Хятадын зах зээлд чухал байр суурь эзэлж байгааг харуулж байна.