2025 онд Монгол Улсад шинээр баригдсан орон сууцны тоо 25 мянга давж, түүхэн дээд түвшинд хүрснийг Хот Байгуулалт, Барилга, Орон Сууцжуулалтын Яамнаас мэдээллээ. Барилга угсралт болон их засварын ажлын гүйцэтгэл 2025 онд 11.7 их наяд төгрөгт хүрсэн нь өмнөх оноос 28 хувиар өссөн үзүүлэлт болж, мөн хамгийн өндөр түвшинд тооцогдож байна. Нийт барилгын ажлын 37.8 хувийг орон сууцны барилга эзэлж байгаа бөгөөд шинэ орон сууцны нийлүүлэлт барилгын салбарын өсөлтөд голлон нөлөөлснийг Үндэсний статистикийн хороо онцолжээ.

Монголын эдийн засаг 2025 онд 6.8 хувиар өсөхөд барилгын салбар чухал хувь нэмэр оруулсан байна. Тодруулбал, нийт эдийн засгийн өсөлтийн 0.5 хувийг барилгын салбар дангаараа бүрдүүлсэн бөгөөд орон сууцны барилгын идэвхжил энэ өсөлтөд томоохон нөлөө үзүүлжээ.

2025 оны дөрөвдүгээр улирлын байдлаар зах зээлд 61.2 мянган шинэ орон сууцны нийлүүлэлт хийгдсэн талаар үл хөдлөх хөрөнгийн зах зээлийн судалгааны компаниуд мэдээлсэн байна. Эдгээрийн 70.4 хувь нь стандарт зэрэглэлийн орон сууц бөгөөд нэг метр квадратын дундаж үнэ ойролцоогоор 3.8 сая төгрөг байна. Мөн 11 мянга гаруй айлын дундаж зэрэглэлийн орон сууц ашиглалтад орж, нэг метр квадратын үнэ нь дунджаар таван сая төгрөг байгаа аж. Харин бизнес болон өндөр зэрэглэлийн орон сууцны нэг метр квадратын үнэ 6.7-8.3 сая төгрөгийн хооронд хэлбэлзэж байна