Барилгын салбарын хамгийн сүүлийн үеийн мэдээ мэдээлэл, мэргэжлийн нийтлэл, үнэ ханшийн судалгааг сар бүр шинэчлэн хүргэдэг Барилга МН сэтгүүлийн гуравдугаар сарын дугаар уншигчдадаа хүрч эхэллээ. 

Энэ удаагийн нүүр хуудсанд плитаны тэргүүлэх Hongyu, Gani, Giania брэндүүдийн албан ёсны дистрибьютер ТОП КЕРАМИКС ХХК хамтран ажиллаа. 

190 дэх дугаарын онцлох булангуудаас танилцуулбал,

VIP ярилцлага: С.МӨНХБАТ: БАРИЛГЫН САЛБАРЫНХНЫГ БОДИТООР СЭТГЭЖ, БҮТЭЭЖ ЧАДДАГ ХҮМҮҮС ГЭЖ БОДДОГ 

Барилгын салбарын хөгжлийн 30 орчим жилийн түүхийг бүтээхэд гар бие оролцож, 40 орчим барилгын төслийг бүтээн байгуулсан EFES группийн ерөнхийлөгч, Монгол Улсын гавьяат барилгачин, манлай уяач С.Мөнхбатыг энэ удаагийн зочин хоймортоо урилаа.

Тэрээр Москва хотын Авто замын дээд сургуульд (МАДИ) суралцаж, улмаар 1991 онд Политехникийн дээд сургуулийг Иргэний ба үйлдвэрийн барилгын инженер мэргэжлээр магистр хамгаалж төгссөн юм. Нийгмийн шилжилтийн хүнд цаг үед худалдааны чиглэлээр анхны бизнесээ эхэлж байсан тэрээр өдгөө 30 жилийн түүхтэй групп компаниа байгуулжээ. Ингээд түүний амьдралын түүх, барилгын салбар дахь бизнесийн туршлагаас хуваалцсан ярилцлагыг хүлээн авч уншина уу. 

СУДАЛГАА: БАРИЛГЫН САЛБАРЫН “ДАЛД” ГАЦАА- ЖДҮ ЭРХЛЭГЧИД БА АВЛИГЫН ТОЙРОГ

Энэ удаагийн судалгаагаар Улаанбаатар хотын барилгын материалын худалдаа, үйлчилгээний 171 бизнес эрхлэгчээс асуулга авч, 10 захиралтай ганцаарчлан ярилцаж, энэхүү "лабиринт"-ын дотор талыг нарийвчлан тодорхойллоо.

Судалгаанд хамрагдсан хүмүүс бол БАРИЛГЫН салбарт 10-аас дээш жил тогтвортой ажилласан, дээд боловсролтой, туршлагатай мэргэжилтнүүд байсан ба тэдний хувьд авлига бол "шунал" биш, харин бизнесийн амьсгалах орон зайг боомилж буй бодит дарамт болж буйг энэхүү судалгааны тоо баримтаас уншаарай. 

МЭРГЭЖИЛТНИЙ ҮГ: МОНГОЛ УЛСЫН ДЭД БҮТЦИЙН ХӨГЖИЛ 

Сүүлийн 10 жилийн хугацаанд Монгол Улс дэд бүтцээ сайжруулах, ард иргэдийнхээ амьдралын чанарыг сайжруулах, эдийн засгийн өсөлтийг дэмжих зорилготой томоохон аялалд гарсан. Энэ нийтлэлд Монгол Улсын дэд бүтцийн бүтээн байгуулалт, одоогийн санаачилга, тулгамдаж буй асуудал, дэд бүтцийн гол дутагдлыг арилгах ирээдүйн төлөвлөгөөг судалсан болно.

МИНИЙ ТҮҮХ: БИДНИЙ ДУЛААХАН ГЭР 

Амьдралаас нэгнээ олж, хайраараа нийлсэн залуу хосуудын хамгийн анхны том зорилго бол тусдаа гарч орон байртай болох явдал байдаг. Заримд нь энэ нь холын мөрөөдөл хэвээр үлддэг бол, зарим нь бодит шийдвэр болгож чаддаг. Сайнжаргалын Ануцэцэг, Пүрэв-Очир нар 2019 онд танилцаж, тэр жилдээ гэр бүл болсон. Тэд тэр үеэсээ л “байртай болъё” гэж ярилцан хадгаламж хийж эхэлсэн бөгөөд өнөөдөр гурван сайхан үрсийнхээ инээдээр гэрээ жаргаасан гэрийн эзэн, эзэгтэй болжээ.

ТОДРУУЛГА: БАРИЛГЫН САЛБАРЫН ШИНЭ МЕГА ЗАХ ЗЭЭЛ “СЭЛБЭ 20 МИНУТЫН ХОТ”

Улаанбаатар хотыг олон төвт хот болгон хөгжүүлэх "2040 хөгжлийн ерөнхий төлөвлөгөө"-ний хүрээнд хэрэгжиж буй хамгийн том мега төсөл бол "Сэлбэ 20 минутын хот" юм. “20 минутын хот” гэдэг нь иргэд өдөр тутмын хэрэгцээт үйлчилгээ болох сургууль, цэцэрлэг, эмнэлэг, дэлгүүр, ажил, ногоон байгууламж зэрэгтээ 20 минутын дотор алхах эсвэл дугуйгаар хүрэх боломжтой хот төлөвлөлтийн загвар юм.

Уг төсөл нь Чингэлтэй дүүргийн 14, 18-р хороо, Сүхбаатар дүүргийн 14-р хорооны нутаг дэвсгэрт 158 га талбайд Сэлбэ дэд төв орчмын гэр хорооллыг орон сууцжуулж, иж бүрэн цогцолбор хороолол байгуулна. Өөрөөр хэлбэл гэр хорооллын дахин төлөвлөлтийг хэсэгчилсэн шийдлээр бус цогц төлөвлөлтөөр хөгжүүлж буй анхны том хэмжээний төсөл болж байна. Төслийн талаарх дэлгэрэнгүй мэдээлэл, хувийн хэвшилтэй хамтрах үндсэн чиглэлүүдийн талаар энэхүү булангаас уншаарай. 

ДУУЛГАХ СОНИН: ГИЗАГИЙН ИХ ПИРАМИДЫН ГИДРАВЛИК СИСТЕМ - БООЛУУДЫН БҮТЭЭЛ БИШ

Бид хоёр зууны турш нэг л 'үлгэрт' итгэж ирсэн. Ар араасаа цувсан мянга мянган боолууд элсэн цөлд олс татан, аварга чулуун блокуудыг шороон налуу замаар чирч буй дүр зураг. Энэ бол Холливудын кинонд тохирох үзэгдэл болохоос биш , инженерийн бодит шийдэл биш юм. 

Орчин үеийн инженерийн шинжилгээ, 

• Хэрэв пирамид зүгээр л нэг 'барилга' юм бол түүний дотоод бүтэц яагаад механик систем шиг харагддаг вэ? 
• Хүн явахад зориулагдаагүй налуу хонгилууд, ачаа түгжих тоормосны систем мэт зохион байгуулалттай өрөөнүүд… гэх мэт хэд хэдэн чухал асуултыг тавьж байна. 

Дэлгэрэнгүй баримтыг Дуулгах сонин булангаас хүлээн авч уншаарай. 

Мөн Та Архитектур дизайн, Мэргэжилтний зөвлөмж, Ногоон барилга булангууд барилгын салбарт болсон хамгийн сүүлийн үеийн гадаад болон дотоод мэдээ мэдээллийг хүлээн авч уншаарай.

Түүнчлэн Барилга МН сэтгүүлээс шинэ орон сууцны үнэ ханш, ажил гүйцэтгэх үнэлгээ, барилгын материалын үнэ ханшийг шинэчилсэн байдлаар харах боломжтой. 

СЭТГҮҮЛ ЗАХИАЛАХ 

Утас: 9100-0233, 7711-3333