Мэдээллийн технологийн үндэсний паркаас (МТҮП) санаачлан зохион байгуулсан Хойд жигүүрийн дахин төлөвлөлтийн интерьер зураг төслийн уралдааны дүн өнөөдөр гарлаа. 

Нэгдүгээр сарын 27-ноос эхлэн сарын хугацаанд үргэлжилсэн тус уралдаанд олон улсын болон дотоодын архитектор, дизайны багууд технологийн дэвшил, функциональ шийдлийг хослуулсан төслүүдээрээ өрсөлдсөн юм.

Уралдааны хоёрдугаар шатанд тунаж үлдсэн шилдэг долоон баг өнөөдөр өөрсдийн концепцоо "pitch" хэлбэрээр танилцуулснаас архитектор Б.Ууганбаяр /Forae Architects/ тэргүүн байр эзэллээ. Удаах байруудад А.Байгалмаа болон Б.Бямбажаргал /Creed Studio/ нар шалгарсан бол АНУ-аас төслөө ирүүлсэн архитектор Б.Тэлмэн тусгай байрын шагнал хүртэв. Оролцогчдын зүгээс инновацын төв болох МТҮП-ийн онцлогийг орчин үеийн интерьерийн шийдлээр хэрхэн илэрхийлж болохыг бүтээлүүдээрээ харуулж чадсаныг шүүгчид онцолж байлаа.

Шүүгчдийн бүрэлдэхүүнд Монголын Архитекторуудын Эвлэлийн ерөнхийлөгч Г.Цовоодаваа, Удирдах зөвлөлийн гишүүн Б.Бямбадорж нар ажилласан юм. 

Уг арга хэмжээг Цахим хөгжил, инновац, харилцаа холбооны яам болон Монголын Архитекторуудын Эвлэл хамтран зохион байгуулж, ерөнхий ивээн тэтгэгчээр "FIBO CLOUD" ХХК ажилласан нь технологийн салбарынхан залуу архитекторуудынхаа шинэлэг санаачилгыг дэмжиж буйн тод илрэл боллоо.