“Сэлбэ 20 минутын хот” төслийн олон нийтийн бүс буюу төв зам дагуу амины сууц, таун хаус барих хувийн хэвшлийн компаниудын нээлттэй сонгон шалгаруулалтын санал хүлээн авах хугацаа 2026 оны 3 дугаар сарын 2-ны өдөр дууслаа. Энэхүү сонгон шалгаруулалтыг өнгөрсөн нэгдүгээр сард зарлаж, материалыг www.selbecity.mn вэб сайтаар 45 хоногийн хугацаанд хүлээн авсан юм. 

Уг сонгон шалгаруулалтад барилгын төсөл хэрэгжүүлэгчид, хөрөнгө оруулагчид, барилгын материал нийлүүлэгчид болон бусад чиглэлийн аж ахуйн нэгжүүдээс урьдчилсан байдлаар 250 орчим санал ирүүлсэн бол олон нийтийн бүсийн нийт 41.92 га талбайд 15 байршилд хөрөнгө оруулах нийт 28 санал бүртгэгдсэн байна.

“Сэлбэ 20 минутын хот корпорац” ХХК-ийн гүйцэтгэх захирал У.Баатар мэдээлж байгаагаар, ирүүлсэн саналуудыг 3 дугаар сарын 16-ны дотор үнэлж, зохих хариуг өгөх аж. Үүнээс хойш төслийн хоёрдугаар шат буюу хамгийн үнэ цэнтэй, эрэлттэй байршлын бүтээн байгуулалтын ажил эхлэх юм байна. Төв зам дагуу байрлах олон нийтийн бүсийг хөгжүүлэх талаар өнгөрсөн оны тавдугаар сард олон нийт болон аж ахуйн нэгжүүдээс санал авч байжээ. Тус бүсийг худалдаа, үйлчилгээ, далд болон давхар зогсоол, үйлчилгээтэй орон сууц, хүнсний зах, амины сууц, таун хаус зэрэг олон төрлийн зориулалтаар төлөвлөн, орон сууц, үйлчилгээний төв бүс болгон хөгжүүлэхээр төлөвлөсөн байна.

“Сэлбэ 20 минутын хот” нь нийт 158 га талбайд хэрэгжиж байгаа хотын хөгжлийн томоохон бүтээн байгуулалт бөгөөд уг төслөөр 8,575 айлын орон сууц баригдан, 45–50 мянган байнгын оршин суугч амьдрах боломжтой болох юм. Төсөл хэрэгжсэнээр өдөрт дунджаар 250 мянган хүний урсгал орж, гарах эдийн засгийн шинэ экосистем бүрдэх тооцоолол гарчээ.