Австралийн Тасмани арлын баруун хэсэгт “Earth’s Black Box” буюу “Дэлхийн хар хайрцаг” нэртэй өвөрмөц байгууламжийг барьж байна. Энэхүү төсөл нь дэлхий дахинд соёл иргэншлийн хэмжээний сүйрэл тохиолдсон нөхцөлд өнөөгийн эрин үеийн дижитал мэдээлэл, баримт бичгийг хадгалан үлдээх зорилготой ажээ. 

Уг санаачилгыг Тасманийн их сургууль, "Clemenger BBDO" агентлаг болон "The Glue Society" уран бүтээлийн нэгдэл хамтран хэрэгжүүлж байгаа бөгөөд уур амьсгалын өөрчлөлт болон дэлхийн тогтворгүй байдлын эрсдэлийг баримтжуулах урт хугацааны архив үүсгэх зорилго агуулж байна.

Геологийн хувьд тогтвортой, алслагдсан бүсэд ойролцоогоор 10 метр урт, 7.5 сантиметр зузаан ханатай цул ган байгууламжийг асар том боржин чулуун суурин дээр байрлуулж байгаа юм. Бүтээгчдийн үзэж буйгаар, энэхүү байгууламж нь эрс тэс цаг уур, байгалийн нөлөөллийг тэсвэрлэж, олон арван жилийн турш хүний оролцоогүйгээр ажиллах боломжтой бөгөөд системийг нарны эрчим хүчээр ажиллуулахаар төлөвлөжээ. “Хар хайрцаг” дотор нүүрстөрөгчийн давхар ислийн агууламж, агаар болон далайн температур, далайн усны хүчилжилт, эрчим хүчний хэрэглээ зэрэг дэлхийн экологийн үзүүлэлтүүдийг тасралтгүй бүртгэх мэдээллийн санг байрлуулах юм. Түүнчлэн улс төрийн шийдвэрүүд, олон улсын мэдээ мэдээлэл, нийгмийн сүлжээний нийтлэлүүдийг архивлан хадгалах аж. Гадаадын эх сурвалжуудын онцолж буйгаар, энэхүү төсөл нь нисэх онгоцны “хар хайрцаг”-ийн зарчмыг дэлхийн хэмжээнд хэрэгжүүлж буй анхны оролдлогуудын нэг бөгөөд ирээдүйн судлаачдад XXI зууны хүн төрөлхтний үйл ажиллагаа, шийдвэрүүдийг бодитоор харах боломж олгоно юм.

Төслийн багийнхан байгууламжийг 2026 онд багтаан бүрэн ажиллагаанд оруулахаар төлөвлөж байна. Хэрэв дэлхий дахинд томоохон гамшиг тохиолдвол уг “хар хайрцаг” нь болсон үйл явдлын шалтгаан, нөхцөлийг ойлгоход дараагийн үеийн чухал эх сурвалж болно гэж санаачлагчид үзэж байгаа юм.