Монгол Улсын Засгийн газрын 2025 оны 45 дугаар захирамжаар орон сууцжуулах эрх зүйн орчныг боловсронгуй болгох ажлын хэсэг байгуулагдсан. Уг ажлын хэсгийн хүрээнд Орон сууцжуулалтын тухай хуулийн төсөл болон "Орон сууцны санхүүжилтийн банкны тухай хуулийн төсөл"-ийг боловсруулаад байна.

Хуулийн төслүүдийг боловсруулсантай холбогдуулан Хот Байгуулалт, Барилга, Орон Сууцжуулалтын Яамнаас Хууль тогтоомжийн тухай хуулийн 8.1.5-д заасны дагуу олон нийтийн хэлэлцүүлгийг 2026 оны 02 дугаар сарын 25-ны өдөр зохион байгууллаа.

Хэлэлцүүлэгт тус яамны Төрийн нарийн бичгийн дарга М.Баяраа, Хот Байгуулалт, Орон Сууцжуулалтын Бодлого, Зохицуулалтын газрын дарга О.Одбаяр, Барилгын хөгжлийн төв ТӨҮГ-ын захирал Д.Мөнхбаатар, Инженерийн дэд бүтцийн хэлтсийн дарга Э.Батболд болон олон улсын байгууллагуудын төлөөлөл оролцов.

Хуулийн төслүүдийн онцлох зохицуулалт

Орон сууцжуулалтын тухай хуулийн төсөлд:

• Төр, хувийн хэвшлийн түншлэлд тулгуурласан орон сууцны нийлүүлэлтийн шинэ тогтолцоо бий болгох
• Орлогын түвшинд тохирсон олон төрөлт орон сууцны бодлого хэрэгжүүлэх
• Бага орлоготой иргэдэд зориулсан халамжийн орон сууц
• Дунджаас доогуур орлоготой иргэдэд зориулсан хөлслөх орон сууц
• Дундаж орлоготой иргэдэд зориулсан түрээслээд өмчлөх орон сууц

Орон сууцны санхүүжилтийн банкны тухай хуулийн төсөлд:

• Ипотекийн зээлийн бүтээгдэхүүнийг иргэдийн орлогын түвшин, байршилтай уялдуулан төрөлжүүлэх
• Санхүүжилтийн эх үүсвэрийг төв банкнаас хэт хамааралгүй болгох
• Зах зээл дэх төвлөрөл, дарааллыг бууруулах
• Үндэсний баялгийн сан, Хуримтлалын сангийн хөрөнгийг хуульд нийцүүлэн иргэдийн орон сууцны хөрөнгө оруулалтад чиглүүлэх

Энэ удаагийн хэлэлцүүлэг нь төрийн байгууллага болон олон улсын зөвлөхүүдийн хүрээнд зохион байгуулагдсан бөгөөд дараагийн шатны хэлэлцүүлгийг иргэд, олон нийтийн дунд өргөн хүрээнд явуулахаар төлөвлөж байна.

Хэлэлцүүлгүүдийн дараа хуулийн төслүүдийг 2026 оны 04 дүгээр сарын 15-ны өдрийн дотор Монгол Улсын Их Хуралд өргөн барихаар ажиллаж байна.