Хот Байгуулалт, Барилга, Орон Сууцжуулалтын яамны дэд сайд С.Энхболд Бүгд Найрамдах Казахстан Улсын гавьяат архитектор Рустамбеков Серик Исаевичийг хүлээн авч уулзав.

Уулзалтын эхэнд С.Энхболд дэд сайд Хархорум хотын төлөвлөлт, бүтээн байгуулалтад үнэтэй санал, зөвлөмж өгөхөөр хүрэлцэн ирсэн Казахстаны архитекторуудад талархал илэрхийлэв. Тэрбээр Монгол Улс болон Бүгд Найрамдах Казахстан Улс түүх, соёл, уламжлалын хувьд ойр, харилцан итгэлцэлд суурилсан найрсаг харилцаатай улс орнууд болохыг онцлов.

Уулзалтын үеэр талууд хоёр улсын харилцаа, ялангуяа 1992 оны 1 дүгээр сарын 22-нд дипломат харилцаа тогтоосноос хойш улс төр, эдийн засаг, соёл, боловсрол, хот байгуулалтын салбарт тогтвортой хамтын ажиллагаа өрнөснийг тэмдэглэлээ. Мөн Астана хотын төлөвлөлт, бүтээн байгуулалтын туршлага, хэрэгжилтийн явцад тулгарч байсан хүндрэл, авсан сургамжийг хэлэлцэж, эдгээрийг Хархорум хотын хөгжлийн ерөнхий төлөвлөгөөнд тусгах боломжийн талаар санал солилцов.

Уулзалтын төгсгөлд талууд эртний нийслэл Хархорум хотын түүх, соёлыг орчин үеийн хот байгуулалттай уялдуулан олон улсын жишигт нийцсэн хот болгон сэргээн хөгжүүлэхэд хамтран ажиллах нь чухал гэдэгт санал нэгджээ.