Барилга, дэд бүтцийн салбарын бизнес эрхлэгчидтэй Улаанбаатар хотын дарга Х.Нямбаатар 2026 оны 2 дугаар сарын 7-нд уулзалт зохион байгуулж, газрын асуудал, цахилгаан, дулаан, ус хангамж болон инженерийн дэд бүтцийн хангамжийн талаар санал солилцлоо.

Уулзалтын үеэр хотын дарга Х.Нямбаатар орон сууцны ипотекийн санхүүжилтийн эх үүсвэр дутагдалтай байгаагаас шалтгаалан барилгын компаниудын борлуулалтад хүндрэл үүсэж байгааг онцолсон юм. Тэрбээр энэхүү асуудлыг шийдвэрлэх зорилгоор хот ипотекийн сан байгуулах талаар судалгаа хийж байгаа гэдгээ мэдэгдэв.

Тодруулбал, уг сангийн эх үүсвэрийг эхний ээлжид Сэлбийн борлуулалтад ашиглахаар төлөвлөж байгаа бөгөөд Сэлбэ дэд төвд баригдах 9,000 орчим айлын орон сууцыг хот ипотекийн эх үүсвэрээр 8 хувийн хүүтэй зээлээр борлуулах боломжийг судалж байна гэв. Мөн хөгжсөн орнуудын жишгээр хотууд ипотекийн банк, санхүүгийн бие даасан механизмтай байх шаардлагатайг онцолжээ.

Түүнчлэн Улаанбаатар хотод хамгийн их бүтээн байгуулалт хийж, татварын орлого бүрдүүлдэг салбар нь барилгын салбар боловч дулаан, цахилгаан хангамж болон инженерийн дэд бүтцийн техникийн нөхцөлүүд дээр олон хүндрэл тулгарсаар байгааг дурдсан байна.