Барилгын салбарын онцлох зочны ярилцлага, мэргэжлийн нийтлэл, цаг үеийн мэдээ мэдээлэл болон барилгын материалын үнэ ханш, ажил гүйцэтгэлийн үнэ ханшийг сар бүр шинэчлэн гаргадаг Барилга МН сэтгүүлийн 2 дугаар сарын дугаар уншигчдадаа хүрч эхэллээ. 

Энэ удаагийн нүүр хуудсанд Рояал Тауэр Констракшн ХХК хамтран ажиллаа. “Рояал Тауэр Констракшн” ХХК нь 2017 онд гадаад худалдаа, барилгын материалын худалдаа, худалдааны зуучлалын чиглэлээр үйл ажиллагаа явуулж эхэлсэн бөгөөд өдгөө барилга угсралт, барилгын засал чимэглэл, худалдаа борлуулалтын чиглэлээр нийт 41 инженер техникийн ажилтаны бүрэлдэхүүнтэйгээр үйл ажиллагаа явуулан ажиллаж байна.

Барилга МН  сэтгүүлийн 02 дугаар сарын онцлох булангуудаас танилцуулж байна 

VIP ярилцлага: О.Мэлсчо: Стратегийн ач холбогдолтой томоохон үйлдвэрүүдээ төр хувийн хэвшилтэй хамтран барих хэрэгтэй

Эрдэмтэн мэргэд, ахмад үеийнхний хуримтлуулсан мэдлэг, арвин туршлага, тэдний хийж бүтээсэн үйл хэрэг нь ирээдүйн хөгжил дэвшлийн бат бөх суурь болдог билээ. Үүний нэгэн тод жишээ болсон эрхэм хүнийг энэ удаагийн дугаартаа урилаа. Энэ хүн бол Монгол Улсын Гавьяат барилгачин О.Мэлсчо юм. Тэрээр 1970 онд Иркутскийн Политехникийн дээд сургуулийг төгсөж, тухайн үеийн Барилга, барилгын материалын үйлдвэрийн яаманд мэргэжилтнээс эхлэн газрын дарга, Улсын барилгын хорооны барилгын материалын үйлдвэрлэл хариуцсан орлогч дарга хүртэлх албан тушаалыг хашиж, салбарын үйлдвэрлэлийн бодлогыг тодорхойлоход голлон оролцож байв. 

Нийгэм солигдох үед 1990 оноос Улаанбаатарын Байшин үйлдвэрлэх II комбинатын даргаар томилогдон ажиллаж, зах зээлийн шилжилтийн хүнд цаг үед салбарын тогтвортой хөгжлийг хангахад өөрийн хувь нэмрээ оруулсан байна. Түүнчлэн барилгын салбарын гол гол стандартыг бий болгоход биечлэн оролцож, анх удаа эмхэтгэн товхимол хэлбэрээр гаргаснаас гадна мэргэжлийн ном, эрдэм шинжилгээний судалгаанууд туурвиж, салбарын анхны “Нэвтэрхий толь”-ыг бүтээж, оюуны томоохон өвийг бүтээсэн билээ.

Төлөв байдал: Барилгын салбарын төлөв байдал /2026 он/

2026 оны улсын төсөв болон мөнгөний бодлогын үндсэн чиглэл батлагдаж, орлого, зарлагын төсөөлөл, чиг баримжаа тодорхой болоод байгаа билээ. Юуны өмнө олон улсын зээлжих зэрэглэлийг тогтоогч байгууллагууд Монгол Улсын зээлжих зэрэглэлийг ээлж дараалан сайжруулсан нь 2026 онд гадаад санхүүжилтийн өртөг буурах, цаашлаад гадаад эх үүсвэрийг төр, хувийн хэвшил татан төвлөрүүлэхэд эерэг хүлээлт үүсгээд байна. Манай улсын зээлжих зэрэглэл сайжрахын хэрээр гадаад санхүүжилтийн эх үүсвэр нэмэгдэх, улмаар ногоон зээл, бизнесийн зээлийн хүртээмж цаашид нэмэгдэх нөлөөтэй бөгөөд барилгын салбарт дунд, урт хугацааны эерэг суурийг тавьж байна.

Тодруулга: “2026 онд байр авах уу? Хүлээх үү?”

Орон сууцны үнэ сүүлийн жилүүдэд тасралтгүй өсөж, иргэдийн дунд “үнэ хэзээ буурах вэ?” гэсэн хүлээлт улам нэмэгдсээр байна. Ялангуяа энэ онд байр худалдан авах шийдвэрээ хойшлуулах уу, эсвэл одоогийн нөхцөлд боломжоо ашиглах уу гэсэн асуулт олон хүний өмнө бодитоор тулгараад байна.

Энэ удаагийн тодруулгаар “2026 онд байр авах уу, хүлээх үү?” гэсэн асуултад зах зээлийн тоон үзүүлэлт, макро эдийн засгийн орчин, ипотекийн санхүүжилт болон нийлүүлэлтийн нөхцөлийг цогцоор нь авч үзэн, эдийн засгийн суурь хүчин зүйлсэд тулгуурлан хариулт хайлаа.

Мэргэжилтний үг: Барилга байгууламжийн чанарын хяналтад төмөр бетон бүтээцийг үл эвдэх сорилын аргаар шалгах нь /2-р хэсэг/

Барилга байгууламжийн чанарын хяналтын хүрээнд төмөр бетон бүтээцийг үл эвдэх сорилын аргаар бат бэхийг үнэлэх нь барилгын аюулгүй, найдвартай ажиллагааг хангах суурь нөхцөл болдог. Мөн барилга байгууламжийн ашиглалтын явцад төмөр бетон бүтээцийн бат бэхийг үл эвдэх сорилын аргаар үнэлэх шаардлагатай байдаг.

Хийц, бүтээцийг эвдэлгүйгээр үнэлэх Non-Destructive Testing (NDT) буюу Үл эвдэх сорил, туршилт, шалгалтын аргууд онцгой ач холбогдолтой байдаг бөгөөд энэ хүрээнд төмөр бетон хийцэд өргөн хэрэглэгддэг NDT-ийн үндсэн аргууд болох биет үзлэг (VT), шмидтийн алхаар хийх сорилт, хэт авианы долгионы арга (UPV), арматур илрүүлэх аргуудаар багажны хэрэглээ, давуу тал, хязгаарлалтыг инженерийн практик болон олон улсын стандартын хүрээнд товчхон тайлбарлав.

Мэргэжилтний зөвлөмж: “Нэвтэрхий толь” №1

“Барилгын үйлдвэр, барилгын материалын аж үйлдвэр” нэртэй “Нэвтэрхий толь” 2026 онд хэвлэгдэн гараад байгаа билээ. Энэхүү нэвтэрхий толь нь манай орны барилга, архитектур, барилгын материалын аж үйлдвэрийн салбарын инженер техникийн ажилтнууд, мэргэшсэн ажилчид, мэргэжлийн сургалт үйлдвэрийн төвүүдийн багш, оюутнуудад өөрсдийн мэдлэгээ гүнзгийрүүлж, өргөжүүлэх гарын авлага нь болж буй. Тиймээс Барилга МН сэтгүүлээрээ дамжуулан энэхүү номын дээжээс цувралаар хүргэж байна. 

Миний түүх: Мэдэхгүй зүйлээ асуухаас бүү ич. Харин мэдэхийг хүсэхгүй байгаагаасаа ичих хэрэгтэй

Өмнөговь аймгийн Булган сумын уугуул, малчин айлын таван хүүхдийн дунд охин Б.Хоролсүрэн өнөөдөр “Оюутолгой”-н Галын системийн багт техникчээр ажиллаж байна. Тэрээр “эрэгтэй хүн хийдэг” гэх уламжлалт ойлголтыг эвдэж, цахилгаанчны мэргэжлийг эзэмшин, дэлхийн хэмжээний бүтээн байгуулалтад 1300 метрийн гүнд, тас харанхуйг гэрэлтүүлэн ажиллаж буй залуу мэргэжилтэн юм.

Судалгаа: Газрын зах зээлийн судалгаа (2026 он)

Энэхүү судалгаанд 2026 оны 1 дүгээр сарын 19-нөөс 23-ны хооронд Улаанбаатар хот болон түүний орчмын бүс нутагт зарлагдсан газрын буюу үл хөдлөх хөрөнгийн зах зээлийн бодит өгөгдлүүдийг ашигласан. Судалгааны түүвэрт нийт 482 нэгж өгөгдөл (зар) хамрагдсан бөгөөд орон зайн байршил, зориулалтын хувьд тэнцвэртэй байдлыг хангах үүднээс дараах 4 үндсэн хэсэгт хуваан шинжилсэн болно.

Архитектур дизайн: Хүн төрөлхтний бүтээсэн хамгийн том дижитал ертөнц MSG SPHERE

2023 оны 9-р сарын 29-нд Лас Вегас хотноо нээлтээ хийсэн MSG Sphere бол барилгын салбарт сүүлийн 100 жилд гараагүй технологийн асар том хувьсгал байсан юм. Нийт 2.3 тэрбум ам.долларын өртөгтэй энэхүү мега төсөл нь архитектур, математик, медиа урлаг, инженерчлэлийн төгс нэгдэл билээ. Энэхүү гайхалтай барилгын талаарх сонирхолтой мэдээллийг  энэхүү булангаас хүлээн авч уншаарай. 

Мөн Та Интерьер дизайны булан, барилгын салбарт болсон хамгийн сүүлийн үеийн гадаад болон дотоод мэдээ мэдээллийг хүлээн авч уншаарай.

Түүнчлэн Барилга МН сэтгүүлээс шинэ орон сууцны үнэ ханш, ажил гүйцэтгэх үнэлгээ, барилгын материалын үнэ ханшийг шинэчилсэн байдлаар харах боломжтой. 

СЭТГҮҮЛ ЗАХИАЛАХ 

Утас: 9100-0233, 7711-3333