Дулааны тавдугаар цахилгаан станц (ДЦС-5)-ын барилга угсралтын ажил  ирэх дөрөвдүгээр сард эхэлнэ. Уг  станц нь 300 МВт цахилгаан, 340 Гкал дулаан үйлдвэрлэх суурилагдсан хүчин чадалтай бөгөөд Баянгол дүүргийн 20 дугаар хорооны нутаг дэвсгэрт, ДЦС-2-ын үнсэн сангийн талбайд баригдана. 

Төслийг төр, хувийн хэвшлийн түншлэлийн хүрээнд хэрэгжүүлж байгаа бөгөөд гүйцэтгэгчээр “Митайм Интернэйшнл” ХХК ажиллаж байна.

Нийслэлийн Засаг дарга Х.Нямбаатарын мэдээлснээр ДЦС-2-ын үнсэн сангийн талбайг чөлөөлөх ажлыг хоёрдугаар сарын 15-наас эхлүүлж, барилга угсралтын ажлыг 2026 оны дөрөвдүгээр сарын 21-нээс эхлүүлэхээр төлөвлөжээ. Зуухны угсралтын ажил долоодугаар сард, турбин, генераторын угсралтыг арванхоёрдугаар сард эхлүүлэх бөгөөд станцыг 2028 онд үе шаттайгаар ашиглалтад оруулах юм.

ДЦС-5 нь 2×150 МВт хүчин чадал бүхий хоёр блоктой, агаар мандалд ялгарах NOx, SO₂-ыг хянах системтэй, эргэлтэд буцлах үет шаталттай (CFB) зуух ашиглах бөгөөд усны хэрэглээг бууруулсан, байгаль орчинд ээлтэй шийдлээр баригдах юм.

Тус станц ашиглалтад орсноор Улаанбаатар хотын өсөн нэмэгдэж буй цахилгаан, дулааны хэрэгцээг хангаж, төвийн эрчим хүчний системийн ачааллыг бууруулах, хотын баруун хойд бүсийг орон сууцжуулах суурь нөхцөлийг бүрдүүлэх ач холбогдолтой юм.