Монгол Улсын Тэргүүн Шадар сайд бөгөөд Эдийн засаг, хөгжлийн сайд Ж.Энхбаяр, дэд сайд С.Даваасүрэн нар Хот Байгуулалт, Барилга, Орон Сууцжуулалтын яамны сайд Э.Бат-Амгалан болон яамны удирдлагуудыг хүлээн авч уулзлаа.

Уулзалтаар хот байгуулалт, барилга, орон сууцжуулалтын салбарт хэрэгжүүлж буй бодлого, төсөл хөтөлбөрүүдийг Хөгжлийн бодлого, төлөвлөлтийн тухай хуультай нийцүүлэх, бусад салбарын бодлоготой уялдуулах асуудлаар санал солилцсон байна.

Сайд Э.Бат-Амгалан барилгын салбарт үйл ажиллагаа явуулж буй аж ахуйн нэгжүүдэд хөнгөлөлттэй, шуурхай, ил тод, авлигагүй орчин бүрдүүлэх зорилгоор хууль эрх зүйн шинэчлэл хийж байгааг онцлов. Энэ хүрээнд Орон сууцжуулалтын тухай, Орон сууцны санхүүжилтийн банкны тухай, Газрын багц хуулийн төслүүдийг боловсруулж, мөн салбарт мөрдөгдөж буй дүрэм, журам, стандартыг цэгцэлж, Барилгын тухай хуулийн шинэчилсэн найруулгад тусгахаар ажиллаж байна.

Түүнчлэн Хот байгуулалтын ерөнхий төлөвлөгөөний хүрээнд 2025 онд 45 сумын Хөгжлийн ерөнхий төлөвлөгөөг баталж, хүн амын шилжилт хөдөлгөөнийг зохицуулах, бүс нутгийн тэнцвэртэй хөгжлийг хангахад анхаарч буйг мэдээлэв.

Тэргүүн Шадар сайд Ж.Энхбаяр барилгын материалын үйлдвэрлэл, хангамжид чиглэсэн тусгай бодлого боловсруулж, Орон сууцжуулалтын банктай уялдуулан салбар хоорондын хамтын ажиллагааг бэхжүүлэх шаардлагатайг онцоллоо.