Нийслэлийн Санхүү, эдийн засаг, хөгжлийн бүтээн байгуулалтыг эрчимжүүлэх төсөл, хөтөлбөрийн зохицуулагч Л.Хосбаяр тэргүүтэй албаныхан БНИУ-ын Тэргүүний архитектор Лука Бертаччи, “Atelier Ten” компанийн захирал Иван Йованович болон бусад төлөөлөгчдийг хүлээн авч уулзлаа. 

Уулзалтын гол зорилго нь Улаанбаатар хотын хөгжлийн томоохон төслүүдийн хүрээнд цаашдын хамтын ажиллагааг талаар санал солилцох байв. 

Уулзалтын эхэнд Л.Хосбаяр нийслэлд хэрэгжиж буй томоохон төсөл, хөтөлбөрүүд болон 2026 оныг бизнес эрхлэгчдийг дэмжих жил болгон зарласныг танилцууллаа. Тэрбээр төр, хувийн хэвшлийн түншлэлийн хүрээнд хэрэгжиж буй “Хүннү хот”, “Улаанбаатар трамвай”, “Лаг хатааж, шатаах үйлдвэр” зэрэг мега төслүүдэд хамтран ажиллах сонирхлоо илэрхийлэв.

Мөн Улаанбаатар хөрөнгө оруулалт, менежмент ҮЦК ХХК-ийн Гүйцэтгэх захирал Г.Гангамөрөн хотын хөгжлийн ерөнхий төлөвлөгөөтэй нийцсэн төслүүдэд хөрөнгө оруулалт хийх боломжтойг онцлолоо.

Уулзалтын төгсгөлд БНИУ-ын төлөөлөгчид сонирхож буй төсөл, хөтөлбөрүүдийн талаар тодруулж, хоёр талын хамтын ажиллагааг бэхжүүлэх чиглэлд дэмжлэг үзүүлж, хамтран ажиллах боломжтой гэдгээ илэрхийлсэн юм.