Австралийн Брисбен хотын захиргаа 2032 оны Олимпын наадмын нээлт, хаалтын ёслол болон хөнгөн атлетикийн тэмцээн явагдах гол стадионы төлөвлөгөөгөө зарлалаа. Нийт 2.3 тэрбум ам.долларын өртөгтэй уг байгууламжийг Брисбен хотын уламжлалт орон сууцны хэв маяг болох “Queenslander”-аас сэдэвлэн бүтээхээр шийджээ. Энэхүү хэв маяг нь “Bluey” хүүхдийн цувралыг үздэг хүмүүст танил байж болох бөгөөд барилгын гадна талыг хүрээлсэн өргөн веранда буюу дээвэртэй тагт, агаар сэлгэлтийн нээлттэй шийдлээрээ онцлог юм. Стадионы дижитал дүрслэлд үзэгчид чөлөөтэй алхаж болох тавцан болон орон нутгийн архитектурын өвөрмөц төрхийг шингээсэн байна.

Гэвч 63,000 хүний суудалтай энэхүү аварга аренаг Брисбен хотын төвд байрлах 158 акр (63.8 га) талбай бүхий Victoria Park-д барихаар төлөвлөсөн нь олон нийтийн эсэргүүцэлтэй тулгарлаа. Өмнө нь эрх баригчид шинээр байгууламж барихаас татгалзаж, одоо ашиглагдаж буй талбайг шинэчлэх нь зүйтэй гэж үзэж байсан ч ийнхүү төлөвлөгөөгөө өөрчилсөн нь шүүмжлэл дагуулах гол шалтгаан болжээ.

Мэдэгдлийн дараа “Save Victoria Park” хөдөлгөөнийхөн уг төслийг түүх, соёлын өв болсон паркийг сүйтгэх аюултайг анхааруулж, танилцуулсан зураг төслийг бодит байдалд нийцэхгүй, зөвхөн үзэмж хөөсөн үзүүлэн хэмээн тодорхойлсон байна. Олимпын наадам дөхөх тусам түүхэн ногоон байгууламжаа хадгалж үлдэх үү, эсвэл дэлхийн хэмжээний шинэ бүтээн байгуулалт хийх үү гэдэг маргаан Австралийн барилга, хот төлөвлөлтийн салбарын халуун сэдэв болоод байна.