Уулын байшин дахь Grandmillennial трэнд

Загвар өмсөгч, реалити шоуны од Кендалл Женнер  Лос Анжелесийн завгүй амьдралаас түр холдон, гэр бүлээрээ амрах, тайван, дулаан орчинд байх зорилгоор уулын байшингаа барьжээ. Энэхүү байшин нь Кендаллын дотоод ертөнц, бүтээлч байдлыг илтгэх интерьерийн урлагийн бүтээл болсон гэж хэлж болох юм.

Женнер уулын газраа ойролцоогоор таван жилийн өмнө худалдан авсан байна. Тэр газрыг худалдаж авахад байсан хуучин байшинг хадгалж үлдээхийг хүссэн ч хэтэрхий хуучирё муудсан тул сэргээх боломжгүй байсан учир шинэ байшин барих шийдвэр гаргасан байна.

“Л.А дахь амьдралдаа би үнэхээр дуртай, гэхдээ хөдөөний энгийн амьдралыг ч бас би их хүсэж байна. Өглөө бүр босоод хувцас солихгүй, нүүр будалтгүй, чөлөөтэй өдрөө өнгөрүүлэх дуртай” гэж Женнер онцолон хэлсэн байна.

Эргэн дурсах "Эмээгийн хэв маяг"

“Эмээгийн хэв маяг” (англиар grandma chic) гэдэг нь интерьер дизайны чиг хандлагад орчин үеийн, тухлаг, уламжлалт элементүүдийг хослуулсан хэв маягийг хэлдэг. Энэ хэв маягт хуучны тавилга, модон самбар, антик эдлэл, гар урлалын эд зүйлс зэрэг уламжлалт зүйлсийг ашиглах нь гол шинж чанар болдог бөгөөд өнгөний хувьд зөөлөн пастель, бор, саарал зэрэг дулаан өнгөнүүд давамгайлдаг. Эмээгийн хэв маяг нь зөвхөн хуучин зүйлсээр хязгаарлагддаггүй орчин үеийн техник хэрэгсэл, гал тогооны тавилга, тавцан зэрэгтэй хослуулснаар өдөр тутмын амьдралд тохиромжтой, тухлаг орчныг бүрдүүлдэг. Энэ хэв маяг нь сүүлийн жилүүдэд “grandmillennial” болон “cottagecore” чиг хандлагатай холбогдон, залуусын дунд тренд болж, хуучны уран сайхны элементүүдийг орчин үеийн тавилгатай хослуулах замаар гэрийнхээ төвийг дулаан, амьдралд ээлтэй орчин болгон хувиргадаг трэнд болж байна. 

Харин Женнерийн хувьд хүүхэд байхдаа Вайоминг мужийн үзэсгэлэнт байгальд морь унаж өссөн нь түүнийг хөдөөгийн амгалан амьдралд дурлах шалтгаан болжээ. Тэрээр энэхүү мэдрэмжээ бодит болгохын тулд архитектор Кирби Ли, интерьер дизайнер Хайди Кайльертэй хамтран “Grandma Chic” буюу "Эмээгийн чамин хэв маяг"-ийг сонгосон сонгон байшингийнхаа дотор заслыг хийсэн байна.

Байшингийн амин сүнс

Кендалл Женнер “эмээгийн хэв маяг” ийг уулын байшингийн тухлаг, уламжлалт элементүүдийг орчин үеийн загвартай хослуулж чадсан. 

Түүний байшинд гал тогооны жижиг камин, нарийн ханын цаас, модон тулгуур, самбар зэрэг уламжлалт элементүүд байгаа бол тухайн өрөөнд орчин үеийн тавилга, техник хэрэгсэл, том цонх, гэрэлтүүлэг зэрэг орчин үеийн элементүүд нэмж байрлуулсан. 

Женнерийн зорилго нь өрөөг “энд сая сая ном уншихыг хүсч байгаа мэт” тухлаг, дулаан, гэртээ байгаа мэт мэдрэмжтэй болгох явдал байсан бөгөөд ингэснээр найз нөхөд, гэр бүлийнхэн цуглаж, тав тухтай өнгөрүүлж чаддаг орчин бүрдүүлжээ. Үүгээрээ Женнерийн интерьер нь эмээгийн хэв маягийн уламжлалт дулаан мэдрэмжийг хадгалж, орчин үеийн тансаг, өдөр тутмын хэрэглээнд тохиромжтой байдлаар амьдралд нийцүүлсэн бодит жишээ болжээ.

Ингээд түүний уулын байшингийн “эмээгийн хэв маяг”-тай танилцъя.

Хамгийн түрүүнд нүдэнд тусах зүйл бол зочны өрөө нь том цэцгэн хээтэй буйдан. Тод хээ угалз, давхарласан нэхмэл материал, хуучны гэмээр эдлэлээр баялаг орон зайд цэцгэн  хээтэй буйдан дулаан, хөгжилтэй мэдрэмжийг төрүүлдэг. Үүнийг тэрээр хамгийн ихээр хүсч байсан зүйлийн жагсаалтын нэгт байсан гэж онцлон ярьжээ.

Үүдний хэсэгт бараан өнгөөр будсан модон хана, хуучин тавилга, хувийн эд зүйлсийг байрлуулснаар өвөрмөц дүр төрхийг бүрдүүлжээ. Зочны өрөөнд график хээтэй элементүүд, эртний эдлэлүүд, Gibson-Baldwin Les Paul гитар, сүүн шилэн гэрэлтүүлэг нь интерьерийг онцгой болгож сэтгэл татам, амгалан уур амьсгалыг бүрдүүлдэг байна.

Нээлттэй зохион байгуулалттай гал тогоо нь зочны өрөөтэй уялдан, гэрийн төв хэсэг аж. Calacatta Viola гантиг чулуун тавцаны байгалийн тод судлууд нь онцгойрон харагдаж, гүн цэнхэр Lacanche плиткатай хослон тансаг, өдөр тутмын хэрэглээнд тохирсон шийдлийг илүүд үзсэн банйа. Гал тогоонд шилэн тавцан, тавиур, орчин үеийн техник хэрэгсэл болон жижиг камин байрлуулснаар Женнер өөрийн гал тогоог тухлаг, өргөн чөлөөтэй болгож, ингэснээр найз нөхөд болон гэр бүлийнхэн тав тухтай цуглах боломжтой болгожээ.

Бусад өрөөнүүд ч мөн өвөрмөц уур амьсгалтай. Унтлагын өрөөнд тод өнгийн ханын цаас, нарийн нэхмэл хөнжил зэрэг нь үнэхээр тухлаг, тав тухтай уур амьсгалыг бүрдүүлдэг. Ариун цэврийн өрөөнд хуучны хэв маягтай тавилга, металл болон керамик гэрэлтүүлэг, нарийн ширхэгтэй чулуун тавцан нь элегант, цэвэрхэн мэдрэмжийг төрүүлнэ.

Женнерийн уншсан номын цуглуулга, жижиг урлагийн бүтээлүүд нь байшингийн амин сүнс мэт санагдах бөгөөд орон зай бүрт хувийн түүх, сэтгэл хөдлөлийг шингээсэн мэт сэтгэгдэл төрүүлж чадсан байна.

Байшингийн хамгийн сонирхолтой шийдлүүдийн нэг нь 2020 онд Airstream Bambi кемпингийн чиргүүлийг зочны өрөө болгон шинэчилсэн явдал юм. Кендалл энэхүү чиргүүлийн гадна талыг металл, дотор талыг дулаан модон хана, гар нэхмэлийн хивс, цэцгэн хээтэй зөөлөн суудалтай хослуулж үнэхээр төгс хослолыг нэг дор цогцлоожээ. Энэ нь түүний адал явдалд дуртай зан чанарыг илтгэхээс гадна, хамгийн орчин үеийн тансаг амьдрал болон энгийн хөдөөгийн амьдралыг нэг дороос мэдрэх гэсэн хүслийнх нь биелэл юм. 

Женнерийн байшин өнгө, материал, гэрэлтүүлэг, тавилга, жижиг детал бүр нь өөрийн өвөрмөц хэв маягийг харуулж, ирсэн зочид бүрд өөрийн мэт санагдах дотно мэдрэмж төрүүлдэг гэнэ. 

Өнгө, хээ, төгс бус байдлыг зоригтой шингээсэн интерьер нь тухайн оны чиг хандлагаас хамааралгүй, илүү хувь хүний өвөрмөц орон зайг эрхэмлэсэн нь сайн дизайн зөвхөн харагдах байдлаар бус, тухайн орон зайг халуун дулаан, тайван, тав тухыг өгдөг гэдгийг тод харуулж байна.

Женнер хэлэхдээ “Энэхүү байшин надад туршилтынх байсан гэж хэлж болно. Би өөрийн хязгаарыг шалгахыг хүссэн, бас хэрхэн өөрийн хэв маягтаа нийцүүлэн илүү эрсдэлтэй, өвөрмөц шийдлүүдийг туршихыг зорьсон. Энэ нь надад хөгжилтэй, сэтгэл сэргээсэн мэдрэмж төрүүлсэн, бас надад зориулсан жаахан шинэ туршлага байлаа” гэжээ.

Барилга МН сэтгүүлийн 188 дахь дугаараас ...