/Юсухарагийн модон гүүрэн музей/

Японы өмнөд хэсэгт орших Шикоку арлын сүрлэг уулсын дунд, далайн түвшнээс дээш 1,200 метрийн өндөрт "Үүлсийн дээгүүрх хот" хэмээгдэх Юсухара оршдог. Энэхүү алслагдсан жижиг хот өнөөдөр дэлхийн архитектур сонирхогчдын заавал очих ёстой газруудын нэг болсон нь алдарт архитектор Кэнго Кумагийн гайхамшигт бүтээлүүдтэй шууд холбоотой. Түүний бүтээлүүд дундаас технологи болон уламжлалын төгс зохицол болсон "Модон гүүрэн музей" (Yusuhara Wooden Bridge Museum) онцгойлон ялгардаг.

Мартагдсан уламжлалыг сэргээсэн "Кантилевер" бүтэц

Энэхүү байгууламж нь үзэсгэлэнгийн танхим төдийгүй, замын хоёр талд байрлах рашаан сувилал болон зочид буудлыг холбосон стратегийн ач холбогдол бүхий гүүр юм.

Барилгын гол философи нь Японы мартагдаад байсан уламжлалт “ханэ-баши” (hane-bashi) буюу кантилевер (нэг тал нь бэхлэгдсэн тулгуур) гүүрний загварыг орчин үеийн хэлбэрт оруулсанд оршино.

Бүтэц: Бага хэмжээтэй модон гуалингуудыг хоёр талаас нь шатлан давхарлаж, гүүрний дам нурууг босгожээ. Ингэснээр “модоор барьсан чулуун барилга” мэт бат бөх атлаа ердөө ганцхан төв багана дээр тэнцвэрээ хадгалж буй мэт харагдах нь үзэгчдэд туйлын драматик сэтгэгдэл төрүүлдэг.

"Токиёо" систем ба "Доугун" техник

Кэнго Кума энэхүү бүтээлдээ Японы буддын сүмийн архитектурт хэрэглэгддэг “Токиёо” хэмээх угсралтын аргыг ашигласан. Энэ нь модон тулгууруудыг эвлүүлэн давхарлах замаар ачааллыг хуваарилах “доугун” техник бөгөөд барилгыг нэгэн зэрэг сүрлэг бөгөөд хөнгөн харагдуулдаг онцлогтой.

Архитектор Жюмпэй Мацушима: "Бид жижиг огтлолтой материалуудыг угсран, том мөртлөө нарийн мэдрэмжтэй кантилевер бүтцийг уламжлалт аргаар хийж болдгийг харуулахыг зорьсон."

Хэдийгээр барилгын төв багана нь ган материалаар хийгдсэн ч, гаднах модон хийцлэл болон инженерчлэлийн шийдэл нь нийт массыг газар дээр ачаалал багатай, агаарт хөвж буй мэт харагдуулж байгаа нь архитекторын ур чадварын оргил гэж хэлж болохоор юм.

Инженерчлэлийн тооцоолол 

Энэхүү гүүрэн музей нь нийт 47 метр урт бөгөөд хоёр талын газрын өндөр нь хоорондоо 10 метрийн зөрүүтэй (ойролцоогоор 3 давхар байшинтай тэнцэх) байрладаг. Архитектор Кэнго Кума энэ зөрүүг арилгахын тулд ердөө ганцхан төв багана дээр бүх ачааг төвлөрүүлж, хоёр тийш 14 метр урттай хэсгийг ямар ч тулгуургүйгээр агаарт сунгаж барьсан нь гайхалтай.

Барилгыг нутгийн улаан хуш модыг 180х300 мм хэмжээтэйгээр зүсэж, хооронд нь оньсолж 15-аас дээш үе давхарласан байна. Энэхүү уламжлалт "шаталсан" арга нь барилгын хүндийг жигд хуваарилж, нүсэр том дам нуруу ашиглах шаардлагагүй болгожээ. Нийт 445 м² талбай бүхий энэ нүсэр байгууламжийг ердөө 1.5 метрийн диаметртэй ганцхан багана дааж байдаг нь эртний уламжлал болон  орчин үеийн тооцооллын нэгдэл юм.

Соёлын цогцолбор ба үзэсгэлэнгийн орон зай

Музейн дотоод зохион байгуулалт нь коридор болон галерейг нэгтгэсэн маш ухаалаг шийдэлтэй.

Гүүрний нэг талын орц нь газрын түвшинтэй ижил тул барилгын доод давхраас шууд нэвтрэх боломжтой. Харин нөгөө тал нь газраас 10 метрийн өндөрт байрладаг тул зочид шилэн лифтээр дамжин гүүрэнд хүрдэг. Барилгын доторх галерейд орчин үеийн урлаг болон нутгийн гар урлалын бүтээлүүдийг дэлгэн үзүүлдэг бол студийн хэсэгт хүүхдүүдэд зориулсан боловсролын хөтөлбөр, соёлын арга хэмжээг зохион байгуулдаг. Гүүрний хоёр талаар жижиг урлангуудыг байрлуулснаар дамжин өнгөрөх коридорыг үзэсгэлэнгийн орон зай болгон хувиргасан нь ашиглалтын ухаалаг шийдэл болжээ.

Яагаад заавал зочлох ёстой вэ?

Юсухара бол их хотын чимээ шуугианаас ангижруулж, байгалийн амар амгаланд архитектурын гүн гүнзгий мэдрэмж бэлэглэх газар юм. Нарлаг өдөр эндээс Номхон далай болон Сэто дотоод тэнгис тодхон харагддаг байна.

Уулс, ой мод, үүлсийн дунд орших энэхүү байгууламж нь хүний гараар бүтсэн зүйл байгальтайгаа хэрхэн нэгдэн уусаж болдгийн төгс илэрхийлэл юм. Архитектур, дизайн, уламжлалт модон техникийг сонирхогчдын хувьд энэ музей нь "амьд сурах бичиг" билээ.

Барилга МН сэтгүүлийн 188 дахь дугаараас ...