Эрчим хүчний сайд Б.Чойжилсүрэн салбарын өнөөгийн байдал, чадлын дутагдал болон ирэх жилүүдэд хэрэгжүүлэх стратегийн төслүүдийн талаар өнөөдөр /2026 оны 1 дүгээр сарын 21/ мэдээлэл хийлээ.

Сүүлийн хоёр жилийн хугацаанд улсын хэмжээнд 560 МВт-ын шинэ эх үүсвэрийг ашиглалтад оруулсан ч эрчим хүчний хэрэглээний хурдацтай өсөлтийг нөхөж чадахгүй байгааг тэрбээр онцоллоо. 

Шинээр дулааны цахилгаан станц барихад дунджаар 30-36 сар зарцуулагддаг нь богино хугацаанд чадлын дутагдлыг арилгахад гол сорилт болж байна. 

Өнөөдрийн байдлаар хувийн хэвшлийн хөрөнгө оруулалттай төслүүдээс 300 МВт-ын чадал системд нийлүүлэгдэж эхлээд байгаа бөгөөд 2027-2028 онд дахин 300 МВт-ын эх үүсвэрийг ашиглалтад оруулахаар төлөвлөн ажиллаж байна. 

Үүнээс гадна төр, хувийн хэвшлийн түншлэлийн хүрээнд дараах мега төслүүд хэрэгжиж байна:

• Тавантолгойн ДЦС: 300 МВт-ын хүчин чадалтай тус станцын тендер зарлагдсан бөгөөд 598 сая ам.доллар буюу 2 их наяд төгрөгийн хөрөнгө оруулалт шаардлагатай.
• Орон нутгийн төслүүд: Баян суманд 660 МВт, Сэлэнгэ аймагт 70 МВт, Тосонцэнгэлд 30 МВт-ын хүчин чадалтай станцууд тус тус баригдаж байна.

Эдгээр эх үүсвэрүүд төлөвлөгөөт хугацаандаа ашиглалтад орсноор 2027 оноос эхлэн Монгол Улсын төвийн бүсийн эрчим хүчний систем чадлын дутагдалгүй ажиллах боломж бүрдэнэ гэж Сайд тэмдэглэв.