Чингэлтэй дүүргийн 3 дугаар хороонд байрлах хуучин “Урт цагаан” худалдаа, үйлчилгээний төвийн барилгыг 2024 оны арваннэгдүгээр сард нурааж, иргэдийн саналыг үндэслэн далд зогсоол бүхий цэцэрлэгт хүрээлэн, үйлчилгээний төвийн цогцолборыг шинээр барьсан. 

2025 оны наймдугаар сард 1.3 га талбайтай цэцэрлэгт хүрээлэнгийн ил тохижилтыг ашиглалтад хүлээлгэн өгсөн бол гурван давхар үйлчилгээний төв болон 109 автомашины далд зогсоолыг улсын комисс хүлээн авлаа.

Хотын дарга Х.Нямбаатарын мэдээлснээр далд зогсоол нь тусгай хэрэгцээт иргэдэд зориулсан зогсоол, цахилгаан автомашины цэнэглэгч, сул зогсоолын мэдээлэл авах ухаалаг системтэй бөгөөд зогсоолоос үйлчилгээний төв рүү шууд лифтээр холбогдож байна. Шинэ үйлчилгээний төвд жуулчдад зориулсан үйлчилгээ, бэлэг дурсгал, үндэсний үйлдвэрийн бүтээгдэхүүн, кофе шоп, зоогийн газар ажиллах боломжтой. Дээд давхар нь террастай бөгөөд барилгын архитектур, дизайн нь орчин үеийн шийдлийг үндэсний хэв маягтай хослуулснаараа онцлог гэлээ.

Цаашид тус барилгыг нээлттэй сонгон шалгаруулалтаар түрээслэх бөгөөд нийслэл 2026 оныг “Бизнес эрхлэгчдийг дэмжих жил” болгон зарласны хүрээнд дотоодын бизнес эрхлэгчдийг дэмжин ажиллана. “Урт цагаан” үйлчилгээний төв ашиглалтад орсноор ажлын байр шинээр бий болж байгаа юм.