Хот Байгуулалт, Барилга, Орон Сууцжуулалтын яамны сайд Э.Бат-Амгалан БНХАУ-ын буцалтгүй тусламжаар баригдсан Ногоон нуурын 1008 айлын орон сууцыг иргэдийн газраар солих боломжийг судалж буй талаар мэдээллээ. Тус орон сууцыг 2025 оны арванхоёрдугаар сард Улсын комисс бүрэн хүлээн авсан бөгөөд одоогоор газраар солих ажлын судалгааг хийх ажлын хэсэг ажиллаж байна.

Сайдын хэлснээр уг орон сууцыг зах зээлд чөлөөтэй худалдахгүй, зөвхөн нийслэлийн инженерийн шугам, дэд бүтцэд холбогдсон гэр хорооллын айлуудын газартай солих бодлого баримтлах аж. Ингэхдээ Улаанбаатар хотын 2040 он хүртэлх бүсчилсэн төлөвлөгөөтэй уялдуулан, дараагийн дахин төлөвлөлтийн төслүүдийг хэрэгжүүлэх юм. Энэхүү саналыг Засгийн газарт 2026 оны гуравдугаар сарын 15-нд танилцуулахаар төлөвлөжээ.

Ногоон нуурын 1008 айлын орон сууц нь найман блок, 21 давхар, хоёр өрөө бүхий нийт 1008 айлтай бөгөөд төслийн хүрээнд 960 хүүхдийн суудалтай сургууль, 250 хүүхдийн цэцэрлэг баригдах юм. Төслийг 2022 онд эхлүүлж, гурван жилийн хугацаанд барьж ашиглалтад оруулсан байна.