Дэлхийн хамгийн үнэтэй, тансаг брэндүүд зөвхөн автомашин, загварын бүтээгдэхүүн үйлдвэрлэхээс гадна, үл хөдлөх хөрөнгийн салбарт хүч үзэж эхэллээ. Сүүлийн жилүүдэд чинээлэг хэрэглэгчдийн дунд “брэндийн орон сууц” эзэмших нь нийгмийн байр суурь, нэр хүндийн шинэ илэрхийлэл болж байна.

Энэхүү шинэ чиг хандлагын тод жишээ нь Францын алдарт Bugatti брэнд юм. Тэд Арабын Нэгдсэн Эмират Улсын Binghatti Properties-тэй хамтран Дубай хотод 43-46 давхар нэртэй анхны орон сууцны цамхгаа барьж байна. Барилгын загвар нь спорт автомашины өвөрмөц хэв маягтай, тансаг амьдралын хэв маягийг тусгасан бөгөөд оршин суугчдад тусгай бассейн, клуб, автомашины лифт зэрэг дээд зэрэглэлийн үйлчилгээ үзүүлэхээр төлөвлөжээ.

Тус цамхгийн хамгийн хямд орон сууц 5.2 сая ам.доллароос эхэлж байгаа бол, Бразилын хөлбөмбөгийн од Неймар Жуниор нэг пентхаусыг нь 54 сая ам.доллароор худалдан авчээ.

Зөвхөн Bugatti гэлтгүй Mercedes-Benz, Armani, Bulgari, Six Senses зэрэг олон брэнд орон сууцны салбарт хүчтэй орж байна. Гэхдээ эдгээр брэндүүд барилгын дотоод засал, интерьер, үйлчилгээний чанар дээр оролцож, өөрсдийн хатуу стандарт, загварын дагуу төлөвлөдөг байна. 

“Knight Frank” компанийн судалгаагаар, брэндийн нэртэй орон сууцны эрэлт дэлхий даяар огцом өсөж байгааг харуулжээ. 2011 онд ийм төрлийн 169 төсөл хэрэгжиж байсан бол өнөөдөр 611-д хүрч, 2030 он гэхэд 1,019 болж өсөх төлөвтэй. Одоогоор АНУ-ын Майями, Нью-Йорк хотууд энэ чиглэлээр тэргүүлж байгаа ч Дубай хот хамгийн хурдацтай тэлж буй зах зээл болж байна. Тус хотод 2031 он гэхэд 140 гаруй брэндийн орон сууц ашиглалтад орох төлөвтэй бөгөөд үнийн шинэ дээд түвшнийг тогтоох боломжтой. Шинжээчдийн үзэж буйгаар, эдгээр орон сууц нь ховор цүнх эсвэл үнэт эдлэлтэй адил “нийгмийн статусын шинэ валют” болжээ.