Барилгын салбарын онцлох зочны ярилцлага, мэргэжлийн нийтлэл, цаг үеийн мэдээ мэдээлэл болон барилгын материалын үнэ ханш, ажил гүйцэтгэлийн үнэ ханшийг сар бүр шинэчлэн гаргадаг Барилга МН сэтгүүлийн шинэ оны анхны дугаар уншигчдадаа хүрч эхэллээ. 

Энэ удаагийн нүүр хуудсанд Сити Плас ХХК хамтран ажиллаа. Тус компани нь 2010 онд байгуулагдсан бөгөөд барилга угсралт, барилгын дотоод засал чимэглэлийн чиглэлээр цогц үйлчилгээг хэрэглэгчдэдээ хүргэж, барилгын салбарт хувь нэмрээ оруулан, ажиллаж байна.

VIP ярилцлага: Ц.Батгэрэл: “Ногоон, тогтвортой барилга барих нь сонголт бус бүхий л үйлдвэрлэл, хэрэглээний стандарт болох төлөвтэй байна”

Дэлхий нийтэд ногоон барилга барих арга, технологи, олон улсын ногоон барилгын үнэлгээний системүүд эрчимтэй хөгжиж байна. Монгол Улсад ч олон улсын ногоон барилгын стандартыг хангасан барилга байгууламжийн тоо жилээс жилд нэмэгдэж байгаа ч өндөр өртөг, зардлын улмаас иргэд, аж ахуйн нэгжүүдэд төдийлөн хүртээмжгүй байгаа билээ. Тийм ч учраас Монгол Улс өөрсдийн онцлог, нөхцөлд тохирсон үндэсний ногоон барилгын үнэлгээний системтэй болоод буй. Тиймээс энэ удаагийн дугаартаа Монголын Ногоон Барилгын Хүрээлэнгийн гүйцэтгэх захирал Ц.Батгэрэлийг урьж, ногоон барилгын өнөөгийн байдал, үндэсний үнэлгээний системийн онцлог, цаашдын чиг хандлагын талаар ярилцлаа. 

Тодруулга: Бидэнд дулааны “Шинэ соёл” хэрэгтэй 

Монголчууд бид дэлхийн хамгийн хүйтэн нийслэлд амьдардаг. Өвлийг өнөтэй давахын тулд дулаан бидэнд агаар, ус шиг хэрэгтэй. Гэтэл сар бүр төлдөг дулааны төлбөрийн нэхэмжлэхээ хараад "Би яг хэдийг хэрэглээд, юунд төлөөд байна вэ?" гэдэг асуулт танд төрдөг үү? Та гэртээ дулаанаа хэмнэж, паараа хаасан ч, хөрш айл тань цонхоо дэлгээд паараа тултал нь нээсэн ч сарын эцэст төлөх мөнгө ижилхэн гардаг "шударга бус" тогтолцоо удаж байна.

Судалгаагаар хэрэглэгчдийн 60 гаруй хувь нь одоогийн дулааны төлбөрийн системд сэтгэл дундуур байдаг нь тогтоогджээ. Тэгвэл "Дулаанаа хэмнэж, төлбөрөө багасгах боломжтой юу?" гэсэн асуултад, гарц, шийдлийг хайж салбарын мэргэжилтнүүд, инженерийн байгууллагууд болон иргэдийн байр суурийг тодрууллаа.

Ногоон барилга: Улаанбаатар хотын анхны EDGE гэрчилгээтэй ногоон орон сууц 

Азийн Хөгжлийн банк болон Монгол Улсын Засгийн газрын хооронд байгуулсан хэлэлцээрийн дагуу гэр хорооллыг дахин төлөвлөх зорилгоор ногоон орон сууцны төсөл нь хэрэгжиж байгаа билээ. Төслийн хүрээнд 5 мянган айлын ногоон орон сууцны хорооллыг барихаар төлөвлөсөн бөгөөд эхний ээлжид Баянхошуу, Шар хад дэд төвүүдэд газар чөлөөлөлт хийгдсэн 5,6 га талбайд нийт 800 айлын орон сууцыг барихаар 2023 оны 7 сараас барилга угсралтын ажил эхэлсэн. Үүний эхний 110 айлын орон сууцыг улсын комисс шалгаж, үүрэг даалгаврын биелэлтийг үндэслэн хүлээж авсан бөгөөд энэ 11 сарын 11-нд албан ёсоор ашиглалтад оруулах дүгнэлт баталгаажсан.

Улаанбаатар хотын анхны EDGE гэрчилгээний шаардлагыг хангасан ногоон орон сууцны төслийн архитектур төлөвлөлт, онцлох шийдлүүдийн талаар бэлтгэн хүргэж байна. 

Мэргэжилтний үг: Барилга байгууламжийн чанарын хяналтад үл эвдэх сорилын хэрэглээ. I хэсэг

Энэ удаагийн дугаартаа Үл эвдэх сорил (NDT) - ын хэрэглээний талаар “Монгол газрын тос боловсруулах үйлдвэр” ТӨХХК - ийн Технологийн хяналтын ахлах инженер, Зөвлөх инженер Б.Батхишигийн мэргэжлийн нийтлэлийг хүргэж байна. 

Барилга байгууламжийн чанарын хяналтад үл эвдэх сорил (NDT) -ийн хэрэглээ нь угсралтын ажлын чанар, барилгын материал, бүтээцийг эвдэхгүйгээр, хэлбэр хэмжээг алдагдуулахгүйгээр шалгах, үнэлэх арга юм. Энэ нь барилгын аюулгүй байдал, бат бөх байдлыг хангахад чухал үүрэг гүйцэтгэдэг бөгөөд үл эвдэх сорилын зорилго нь:

- Барилгын материал, бүтээц хийцийн бүтцийн гэмтэл, согогийг илрүүлэх

- Материалын физик, механик шинж чанарыг тодорхойлох

- Угсралтын явцад гарсан алдааг эрт илрүүлж засварлах

- Ашиглалтын хугацаанд бүтээцийн бүрэн бүтэн байдлыг хянах зорилтууд байдаг бөгөөд үл эвдэх сорил (NDT) нь түргэн, аюулгүй, эдийн засгийн зардал бага, өндөр нарийвчлалтай гэх мэт давуу талуудтай байдаг. 

Архитектур дизайн: Үүлсийн дээрх уран барилга

Японы өмнөд хэсэгт орших Шикоку арлын сүрлэг уулсын дунд, далайн түвшнээс дээш 1,200 метрийн өндөрт "Үүлсийн дээгүүрх хот" хэмээгдэх Юсухара оршдог. Энэхүү алслагдсан жижиг хот өнөөдөр дэлхийн архитектур сонирхогчдын заавал очих ёстой газруудын нэг болсон нь алдарт архитектор Кэнго Кумагийн гайхамшигт бүтээлүүдтэй шууд холбоотой. Түүний бүтээлүүд дундаас технологи болон уламжлалын төгс зохицол болсон "Модон гүүрэн музей" (Yusuhara Wooden Bridge Museum) онцгойлон ялгардаг.

Дэвшилтэт технологи: Барилгыг сэргээгдэх эрчим хүч үйлдвэрлэгч болгон хувиргаж буй BIPV технологи

Дэлхийн даяар “ногоон” хөгжил рүү эрчимтэйгээр шилжиж, салбар бүрд богино хугацаанд хурдацтайгаар өөрчлөлт шинэчлэлтүүд хийгдсээр байна. Тэр дундаа хүлэмжийн хийн ялгаралд хамгийн их нөлөөлдөг барилгын салбарт шинэ технологиуд нэвтэрч, ногоон, ухаалаг барилга руу эрчимтэй шилжиж байгаа билээ. Тиймээс энэ удаагийн дугаартаа барилгыг эрчим хүч хэрэглэгч биш, харин үйлдвэрлэгч болгож буй BIPV (Building Integrated Photovoltaics) буюу барилгад суурилагдсан нарны эрчим хүч үйлдвэрлэгч технологийн талаар бэлтгэн хүргэж байна. 

Мөн Та Судалгаа, Шинэ материал, Дуулгах сонин булангууд, барилгын салбарт болсон хамгийн сүүлийн үеийн гадаад болон дотоод мэдээ мэдээллийг хүлээн авч уншаарай.

Түүнчлэн Барилга МН сэтгүүлээс шинэ орон сууцны үнэ ханш, ажил гүйцэтгэх үнэлгээ, барилгын материалын үнэ ханшийг шинэчилсэн байдлаар харах боломжтой. 

СЭТГҮҮЛ ЗАХИАЛАХ 

Утас: 9100-0233, 7711-3333