Барилга, уул уурхайн техникийн салбарт дэлхийд тэргүүлэгч Японы "Hitachi Construction Machinery" (HCM) компани корпорацын нэрээ "LANDCROS Corporation" болгон өөрчлөх шийдвэрээ албан ёсоор зарлалаа.

Энэхүү өөрчлөлт нь 2027 оны 4 дүгээр сарын 1-нээс албан ёсоор хэрэгжиж эхлэх бөгөөд компани зөвхөн техник үйлдвэрлэгчээс технологийн цогц шийдэл нийлүүлэгч болон өөрчлөгдөж буйг илэрхийлж байгаа юм.

Шинэ нэр болох "LANDCROS" нь "LAND" - эх дэлхий, газар шороо "CROS" - Customer-Хэрэглэгч, Reliable-Найдвартай, Open-Нээлттэй, Solutions-Шийдэл гэсэн үгсийн нэгдэл бөгөөд хиймэл оюун ухаан, автоматжуулалт, өгөгдлийн шинжилгээнд суурилсан ухаалаг машинуудыг зах зээлд нэвтрүүлэх компанийн ирээдүйн алсын харааг илтгэж буй гэнэ. 

Нэр өөрчлөгдсөн ч хэрэглэгчдийн дунд танил болсон техникүүдийн улбар шар өнгө, дилерүүдийн сүлжээ болон засвар үйлчилгээний чанар хэвээр хадгалагдах бөгөөд 2027 он хүртэлх шилжилтийн хугацаанд хуучин болон шинэ логог хослуулан ашиглахаар төлөвлөжээ.

Одоогийн байдлаар тус компани Герман Улсад "LANDCROS Development Center Europe" судалгаа шинжилгээний төвийг 2026 оны 1 дүгээр сарын 1-нээс эхлэн байгуулан ажиллуулж эхлээд байгаа нь энэхүү брэндийн дор хийгдэх анхны бодит алхам болж байна.