Засгийн газрын 2025 оны арванхоёрдугаар сарын 24-ний өдрийн ээлжит хуралдаанаар аж ахуйн нэгжүүдийг дэмжих, бизнесийн орчныг сайжруулах зорилгоор татварын багц өөрчлөлт хийх шийдвэрийг гаргалаа.

Тодруулбал, аж ахуйн нэгжийн орлогын албан татварын 25 хувиар татвар төлөх босгыг зургаан тэрбум төгрөг байсныг 10 тэрбум төгрөг болгон нэмэгдүүлж, 6–10 тэрбум төгрөгийн ашгийн татварыг 15 хувь болгон бууруулахаар боллоо.

Жижиг, дунд аж ахуйн нэгжүүдийг дэмжих хүрээнд нэг хувиар татвар төлөх орлогын босгыг 1.5 тэрбум төгрөгөөс 2.5 тэрбум төгрөг болгон нэмэгдүүлж, уг хөнгөлөлтийг гурван жилийн хугацаанд хэрэгжүүлэхээр шийдвэрлэв.

Мөн жилийн үйл ажиллагааны борлуулалтын орлого нь 400 сая төгрөгөөс доош аж ахуйн нэгжүүд НӨАТ-ын хялбаршуулсан горимд хамрагдаж, татвараа сар бүр бус улирлаар тайлагнах боломж бүрдэнэ.

Аж ахуйн нэгжүүдийн хүний нөөцийн хөгжлийг дэмжих зорилгоор ажилтнаа сургах, мэргэшүүлэх, ажилтны хувийн хэрэгцээтэй холбоотой зардлыг хасагдах зардалд тооцохоос гадна уг зардлыг төлсөн НӨАТ-ыг хасах боломжийг нээж байна.

Түүнчлэн баримтгүй худалдан авалтыг бэлэн бусаар хийсэн тохиолдолд үнийн дүнд НӨАТ шингэсэнд тооцож, хасалт хийх эрх олгохоор боллоо. Аж ахуйн нэгжүүдийн хууль даган мөрдөлтийн түвшин, үйл ажиллагааны цар хүрээг харгалзан дотоод болон импортын НӨАТ-ын төлбөрийг гурван сар хүртэл хугацаагаар хойшлуулах зохицуулалтыг мөн баталжээ.

Үүнээс гадна үндсэн хөрөнгийн худалдан авалт болон оршин суугч бус этгээдээс авсан ажил, үйлчилгээний НӨАТ-ыг хасах, аж ахуйн нэгжийн гадаадад гарсан үйлчилгээний зардлыг хасагдах зардалд тооцох боломжийг бүрдүүлж байна.

Эдгээр шийдвэр нь аж ахуйн нэгжүүдийн мөнгөн урсгалыг сайжруулах, үйл ажиллагааны уян хатан байдлыг нэмэгдүүлэх, бизнесийн идэвхжилийг дэмжихэд чиглэж буйг Засгийн газраас онцоллоо.