Барилгын салбарын чанар, аюулгүй байдалд томоохон өөрчлөлт авчрах "Барилгын материал, бүтээгдэхүүний аюулгүй байдлын техникийн зохицуулалт" батлагдлаа. 

Энэхүү зохицуулалт нь импортын материалын гарал үүсэл, тохирлын гэрчилгээ дутуу эсвэл баталгаат бус байх, шошго буруу тавих, найрлага зөрөх, хуурамч бичиг баримт ашиглах зэрэг барилгын салбарт тогтмол гардаг байсан зөрчлүүдийг таслан зогсоох суурь нөхцөлийг бүрдүүлж байгаа юм.

Шинэ техникийн зохицуулалтын гол агуулга нь барилгын ажил гүйцэтгэхэд ашиглагдах материал, бүтээгдэхүүний аюулгүй байдал, чанар, тохирлын баталгаажуулалт, эрүүл ахуй болон хүрээлэн буй орчны хамгааллын үндсэн шаардлагыг нэгдсэн стандартаар тогтооход оршино. 

Ингэснээр аж ахуйн нэгжүүд заавал тусгай зөвшөөрөл авах шаардлагагүйгээр, зөвхөн энэхүү техникийн зохицуулалтаар тогтоосон шаардлагын дагуу үйлдвэрлэл, үйлчилгээгээ явуулдаг болох юм.

Энэхүү шийдвэр хэрэгжсэнээр барилгын материалын зах зээлд чанарын нэгдсэн хяналт тогтож, хүний амь нас, эрүүл мэндэд сөрөг нөлөөгүй, стандартын шаардлага хангасан материалаар барилга байгууламж барих боломж нэмэгдэж байна. Мөн үйлдвэрлэгч болон импортлогчдод тавих шаардлага тодорхой болсноор хуурамч бүтээгдэхүүний эрсдэл буурч, салбарын ил тод байдал сайжрах ач холбогдолтой.