Гизагийн пирамидын сүүдэрт эртний соёл ба орчин үеийн архитектур, инженерчлэлийн гайхамшгийг хослуулсан бүтээл сүндэрлэсэн нь Grand Egyptian Museum /GEM/.

GEM нь500,000 м² (ойролцоогоор 70 хөлбөмбөгийн талбай) талбайг хамарсан энэхүү музей нь нэг л соёл иргэншилд зориулагдсан дэлхийн хамгийн том археологийн музейн цогцолбор билээ. Музейн фасадыг гайхамшигт алебастр ба шилээр чимэглэж, янз бүрийн хэмжээ, өнгөтэй гурвалжин хэлбэрүүдээр гоёсон нь эртний Египетэд зориулсан хүндэтгэл мэт. Мөн тасалбарын байр ба гол барилгын хоорондох талбайг чимэглэсэн богино тэгш өнцөгт усан сангуудаар урсдаг чулуу хүртэл пирамид хэлбэртэйгээр бүтээгдсэн.

Төслийн түүх 1992 оноос эхтэй. Тухайн үеийн Ерөнхийлөгч Хосни Мүбарак Каир хотын төвд байрлах хуучин археологийн музейн ачааллыг дийлэхээ больсны улмаас шинэ музей байгуулахыг зарласан байна. 2003 онд Египетийн Соёлын яам музейн барилгын гүйцэтгэгчийг сонгох уралдаан зарлаж, 82 орны 1,557 өрсөлдөгчөөс онцгойрч, Heneghan Peng Architects гэх Ирландын фирм музейн цогцолборыг барих эрхийг авсан байна.

Хэдийгээр Heneghan Peng Architects компанийн уралдаанд түрүүлсэн ч хэрэгжүүлэх эрх олгогдоогүй байсаар барилгын ажил 2005 онд эхэлсэн ч 2011 оны хавар улс орны байдал тогтворгүй болсон тул тодорхойгүй хугацаагаар бүтээн байгуулалт зогссон. Энэ хугацаанд жуулчдын тоо буурч, Засгийн газрын орлого ч буурсан байна. Харин 2014 оноос Япон Улсын санхүү, техникийн томоохон дэмжлэгтэйгээр барилгын ажил дахин эхэлсэн бөгөөд эцэст нь музей 20 жилийн дараа, 2025 оны 11 сарын 1-нд албан ёсоор нээлтээ хийжээ.

Үзмэрийн танхимууд (Exhibition Halls)

GEM-ийн гол үзмэрийн танхим 60 метрийн өндөр, 20,000 м² талбайтай дэлхийн хамгийн том үзмэрийн танхим. Энэхүү асар том орон зайг тулгуур баганагүй буюу дотоод хана багатай байдлаар барихын тулд инженерүүд өндөр бат бэх ган багана, тусгай найрлагатай бетон бүтэц ашигласан нь орчин үеийн инженерчлэлийн гайхамшигт шийдэл болж чаджээ.

Тус танхимд Фараон Тутанхамоны алт, үнэт эрдэнэсийн цуглуулга бүрэн эхээрээ дэлгэгдэх бөгөөд үзэгчдэд эртний Египетийн хаадын сүр хүч, гоо сайхныг гайхшируулан мэдрүүлэх зориулалттай юм.

Сэдэвчилсэн танхимууд “Фараонуудын үе”, “Эртний амьдрал”, “Шашин ба домог”, “Эртний урлаг ба шинжлэх ухаан” зэрэг сэдвээр Египетийн соёлын хувьслыг харуулдаг.Мөн түр үзэсгэлэнгийн танхим нь дэлхийн археологийн шинэ нээлтүүдийг орчин үеийн орчинд танилцуулдаг.

Судалгааны ба сэргээн засварлах төв (Conservation Center)

GEM нь үзүүлэнгээс гадна археологийн судалгаа, сэргээн засварлалтын чухал төв юм. Лабораториуд нь эд өлгийн зүйлсийг хамгаалж, сэргээн засварлах ажлыг гүйцэтгэдэг бол 3D сканнер, рентген зэрэг төхөөрөмжүүд нь олдворыг гэмтээлгүй судлах боломжийг олгодог. Температур, чийгшлийн хяналтын систем нь эд зүйлсийг урт хугацаанд тогтвортой нөхцөлд хадгална.

Боловсролын төв (Education & Learning Center)

Энд лекцийн танхим, мультимедиа ангиуд байрлаж, судлаач, сурагчдад сургалт зохион байгуулдаг. Интерактив өрөө нь AR/VR технологи ашиглан эртний Египетийг “амилуулж”, Хүүхдийн музей нь багачуудыг түүхтэй сонирхолтой хэлбэрээр танилцуулдаг.

Нийтийн үйлчилгээний хэсэг (Public & Visitor Facilities)

GEM нь зочдын тав тухыг бүрэн хангах орон зайтай. 3D кино театр, аудиториум, номын сан ба архивын өрөө, мөн кафе, ресторан, бэлэг дурсгалын дэлгүүрүүд нь Гизагийн пирамидыг харсан үзэгдэх орчин бүхий зочдын таатай орчныг бүрдүүлдэг.

Пирамид хэлбэр ба шилэн фасад

GEM-ийн хамгийн онцлох хэсэг бол Гизагийн алдарт пирамидтай уялдуулан төлөвлөсөн пирамид хэлбэрийн шилэн фасад юм.Архитекторууд шил, чулуу, бетон элементүүдийг уран нарийн хослуулснаар нарны гэрлийг дотоод орчинд жигд нэвтрүүлж, байгалийн гэрэлтүүлэг болон эрчим хүчний хэмнэлтийн төгс тэнцвэрийг бий болгожээ.

Өдөр нарны туяанд алтлаг шаргал гэрэл цацруулж, шөнө нь тунгалаг цэнхэр туяатай өнгөөр солонгорох фасад нь музейг амьд мэт амьсгалж буй мэт бүтээл болгож чадсан байна. 

“Фасадын шийдэл нь эртний Египетийн гэрэл ба сүүдрийн философийг орчин үеийн хэлээр илэрхийлсэн мөнхийн сүр хүчийг илтгэсэн бүтээл юм.

Байгальд ээлтэй технологи

GEM нь ногоон технологиудыг ашиглан XXI зууны музейн загварын жишиг болсон. 

●    Давхар шилэн фасад — дулаан тусгаарлаж, эрчим хүч хэмнэнэ

●    Нарны самбар — сэргээгдэх эрчим хүчийг ашиглана

●    Байгалийн агааржуулалт ба ухаалаг HVAC систем — дотоод орчныг тогтвортой хадгална

●    Усны менежмент, ногоон байгууламж — уур амьсгалын тэнцвэрийг дэмжинэ

Эдгээр шийдлүүд нь музейг байгальд ээлтэй, тогтвортой хөгжлийн бэлгэ тэмдэг болгодог.

Музейн дотоод орчин нь нарны гэрэл, LED гэрэлтүүлэг, интерактив дэлгэц, виртуал технологи зэргийг нэгтгэсэн нь эртний Египетийн түүхийг орчин үеийн хэлээр үзэгчдэд хүргэдэг.

“Энд зочлох нь Египетийн аугаа түүхийг технологи, архитектурын гайхамшгаар дамжуулан биеэр мэдрэх аялал юм”

GEM-ийн үнэ цэнэ нь эртний Египетийн соёлын өвийг орчин үеийн инженерчлэл, архитектур, байгальд ээлтэй технологи, дижитал туршлагатай амжилттай нэгтгэж чадсанд оршино. Пирамид хэлбэр, шилэн фасад, өндөр орон зай нь өнгөрсөн ба ирээдүйг холбосон, архитектурын төгс бүтээл болохыг дахин батлах мэт. Тиймээс ч GEM нь зөвхөн архитектурын гайхамшигт жишээ төдийгүй, XXI зууны уран барилгын оргил, инновац ба уламжлалын нэгдэл юм.